රට ආර්ථික වශයෙන් අර්බුදකාරී තත්ත්වයක පවතින මේ අවස්ථාවේ දී හුදෙකලා තීන්දු ගැනීම අහිතකර බව මුදල් රාජ්‍ය අමාත්‍ය ශෙහාන් සේමසිංහ පවසනවා.
රාජ්‍ය පරිපාලන නිලධාරීන්ගේ සංගමය සහ මුදල් රාජ්‍ය අමාත්‍ය ෂෙහාන් සේමසිංහ අතර පසුගිය දා (03) පැවති විශේෂ සාකච්ඡාවක දී ඔහු මේ බව සඳහන් කළා.
විශේෂයෙන් ම ජාත්‍යන්තර මූල්‍ය අරමුදල සහ ණයහිමි රටවල යෝජනාවන්ට අභියෝගයන් නොවන පරිදි තීන්දු තීරණ ගත යුතු බව අමාත්‍යවරයා මෙහිදී පෙන්වා දුන්නා.
ජනප්‍රිය තීන්දු ගැනීම වෙනුවට රටේ ඉදිරිය ගැන සිතා වැදගත් තීන්දු ගැනීම, මේ අවස්ථාවේ රජයේ වගකීම බව පවසන අමාත්‍යවරයා මැතිවරණ වේදිකාව තුළ ඇතැමුන් රටේ අර්බුද විහිළුවට ගෙන තිබීම කණගාටුවට කරුණක් බව සඳහන් කළා.
පවතින ආර්ථික අර්බුදය විසඳීම සඳහා කිසියම් පාර්ශ්වයක් වැඩපිළිවෙළක් ඉදිරිපත් කරන්නේ නම් ඔවුන්ට රජය හෝ පරිපාලනය භාරදීමට සූදානම් බවයි අමාත්‍යවරයා පෙන්වා දුන්නේ.
මේ අතර විශේෂයෙන් බදු ගෙවීම පැහැර හැර ඇති බදු දැලට හසුකර ගත නොහැකි පිරිස හඳුනා ගැනීම සඳහා ප්‍රාදේශීය පරිපාලන ඒකක සහ දේශීය ආදායම් දෙපාර්තමේන්තුව අතර සම්බන්ධීකරණය නිර්මාණය කළ යුතු බවයි රාජ්‍ය පරිපාලන නිලධාරීන්ගේ සංගමය එහිදී පවසා සිටියේ.
ඊට සිය සහයෝගය ලබාදෙන බව ද එම සංගමයේ සාමාජිකයන් එහිදී ප්‍රකාශ කර සිටියා.
wpDiscuz
