අපනයන විවිධාංගීකරණය සහ අගය එකතු කළ නිෂ්පාදන සඳහා ඉදිරියේ දී සහන ලබාදීමට අපේක්ෂා කරන බව ජනාධිපති අනුර කුමාර දිසානායක පවසනවා.
රජයන් ඇත්තේ කර්මාන්ත අපහසුතාවට පත් කිරීමට නොව පහසුකම් සැලසීමට බවත්, නීති රීති සම්පාදනයේ දී අදාළ ක්ෂේත්ර සමඟ සහ සම්බන්ධතාවක් පවත්වාගෙන යාම මෙන්ම ඒවා ක්රියාත්මක කිරීමේ දී ප්රමාණවත් කාලයක් ලබාදීමේ වැදගත්කමත් ජනාධිපතිවරයා පෙන්වා දෙනවා.
ජනාධිපති අනුර කුමාර දිසානායක මේ බව සඳහන් කළේ, කෘෂි සහ ආහාරපාන ක්ෂේත්රයට සම්බන්ධ පෞද්ගලික අංශයේ ව්යාපාරිකයන් සමඟ 2026 පූර්ව අයවැය සාකච්ඡාවකට ඊයේ (29) පස්වරුවේ ජනාධිපති කාර්යාලයේ දී එක් වෙමින්.
ගොවීන්ට අවශ්ය පහසුකම් සැලසීම, අපනයන, බදු සහන, ප්රතිචක්රීකරණය සහ කර්මාන්ත පවත්වාගෙන යාමේ දී බලපාන නීතිමය තත්ත්වයන් පිළිබඳව ද මෙහිදී පුළුල් ලෙස සාකච්ඡා කෙරුණා.
ගුණාත්මක, කෘෂි සහ ආහාරපාන නිෂ්පාදන අඛණ්ඩව පාරිභෝගිකයා වෙත ලබාදීම පිළිබඳව මෙන්ම එම කර්මාන්තයට අදාළ කටයුතුවල දී ව්යාපාරිකයන් මුහුණ දී සිටින ගැටලු සහ අභියෝග පිළිබඳ මෙහිදී දීර්ඝ ලෙස සාකච්ඡා කළ අතර, ඊට අදාළ ඔවුන්ගේ අදහස් හා යෝජනා ද සාකච්ඡාවට ලක් වුණා.
සෑම නිෂ්පාදනයකම මිල තීරණය කරනුයේ නිෂ්පාදකයා වන නමුත්, කෘෂි නිෂ්පාදනවල දී පමණක් ගැනුම්කරුවන් විසින් මිල තීරණය කිරීමට කෘෂි ක්ෂේත්රයේ අසංවිධිත බව හේතු වී ඇති බවත්, නිෂ්පාදන පාරිභෝගිකයා වෙත ළඟාවීමේ දී විධිමත්භාවයක් දක්නට නොමැති බවත් පෙන්වා දුන් ජනාධිපතිවරයා මෙම ගැටලු විසඳාගැනීමට රජය හා පෞද්ගලික අංශය ඒකාබද්ධව කටයුතු කිරීමේ අවශ්යතාවය ද පෙන්වා දුන්නා.
කෘෂි භෝග, කිරි හා සත්ව නිෂ්පාදන වෙළෙඳපොළ පුළුල් කිරීමට පෞද්ගලික අංශයේ පූර්ණ සහය ලබාගැනීමට රජයේ අවධානය යොමු වී ඇති බවත්, නිෂ්පාදනයන්ට අගය එකතු කිරීමේ කාර්යභාරය ව්යවසායකයන්ට පැවරී ඇති බවත් සඳහන් කළ ජනාධිපතිවරයා, ඒ වෙනුවෙන් රජයක් ලෙස නව ක්රමවේදයක් හඳුන්වාදීමට අපේක්ෂා කරන බව ද සඳහන් කළා.
එමෙන්ම පශු සම්පත් ක්ෂේත්රය කර්මාන්තයක් ලෙස සංවර්ධනය නොවීම හේතුවෙන් එහි ඵලදායිතාවක් ලබාගැනීමට නොහැකි වීම පිළිබඳව ද මෙහිදී අවධානය යොමු කෙරුණු අතර, පශු සම්පත් කර්මාන්ත නගා සිටුවීම සහ නිෂ්පාදන බෙදාහැරීම විධිමත් කිරීම පිළිබඳව ද සාකච්ඡා වුණා.
මුදල් අමාත්යංශයේ ලේකම් ආචාර්ය හර්ෂණ සූරියප්පෙරුම, ජනාධිපති ජ්යෙෂ්ඨ අතිරේක ලේකම් රසල් අපොන්සු, අපනයන සංවර්ධන මණ්ඩලයේ සභාපති මංගල විජේසිංහ යන අය සහ මුදල් අමාත්යාංශයේ නිලධාරින්ද, කෘෂි සහ ආහාරපාන ක්ෂේත්රයට සම්බන්ධ ප්රමුඛ පෙළේ ව්යාපාරිකයෝ රැසක්ද මීට එක්ව සිටියා.
