ජාතික ජන බලවේග ආණ්ඩුවේ මංගල අයවැය හෙට (17) දිනයේ පාර්ලිමේන්තුවට ඉදිරිපත් කිරීමට නියමිතයි.
මුදල් අමාත්යවරයා වශයෙන් ජනාධිපති අනුර කුමාර දිසානායක සිය මංගල අයවැය මෙලෙස හෙට දිනයේ දී ඉදිරිපත් කෙරෙනවා.
ඒ, අනුව හෙට (17) දින පෙරවරු 10.30ට පාර්ලිමේන්තුව රැස්වීමට නියමිතයි.
මේ අතර අයවැය ලේඛනය සකස් කිරීමේ අවසන් අදියර සඳහා වන පූර්ව සාකච්ඡාවක් පසුගිය 13 වනදා පැවැත් වුණේ ජනාධිපතිවරයාගේ ප්රධානත්වයෙන්.
නව රජයේ අයවැය ඉදිරිපත් කිරීමෙන් අනතුරුව විසර්ජන පනත් කෙටුම්පතට අදාළ විවාදය (අයවැය විවාදය) පෙබරවාරි 18 වනදා සිට මාර්තු 21 දක්වා පැවැත්වීමට නියමිතව තිබෙනවා.
පසුගිය ජනවාරි 09 වනදා පළමුවර කියවීම සඳහා පාර්ලිමේන්තුවට ඉදිරිපත් කළ 2025 වසර සඳහා වන විසර්ජන පනත් කෙටුම්පත, දෙවැනිවර කියවීමේ විවාදය පෙබරවාරි 18 සිට 25 දක්වා දින 07ක් පැවැත්වීමට නියමිතයි.
අනතුරුව පෙබරවාරි 25 වැනිදා පස්වරු 6.00ට අයවැය දෙවැනිවර කියවීමේ ඡන්ද විමසීම පැවැත් වෙනවා.
2025 වසර සඳහා වන විසර්ජන පනත් කෙටුම්පතට අදාළ කාරක සභා අවස්ථාවේ විවාදය පෙබරවාරි 27 සිට මාර්තු 21 දක්වා සෙනසුරාදා දින 04ක් ද ඇතුළුව දින 19ක් පැවැත්වීමට නියමිතයි.
ඉන් අනතුරුව විසර්ජන පනත් කෙටුම්පත තෙවනවර කියවීමේ ඡන්ද විමසීම මාර්තු 21 වැනිදා පස්වරු 6.00ට පැවැත්වෙන බවයි පාර්ලිමේන්තුව නිවේදනය කළේ.
