අනියම් සබඳතාවක් හෙළිවීම හේතුවෙන් සිත් තැවුලට පත් කාන්තාවක් වස පානය කර ජීවිතක්ෂයට පත් ව තිබෙනවා.
දසත ප්රාදේශීය වාර්තාකරු පැවසුවේ 33 හැවිරිදි වියෙහි පසුවූ හලාවත – විල්පත ප්රදේශයේ කාන්තාවක් මෙලෙස කෘමිනාශක දියරයක් පානය කර, අසාධ්යයව රෝහල්ගත කළ අවස්ථාවේ දී මියගොස් ඇති බවයි.
එම කාන්තාව අසල්වැසි පිරිමි පුද්ගලයෙකු සමග අනියම් සබඳතාවක් පවත්වාගෙන ගොස් ඇති බවත්, එම පුද්ගලයාගේ බිරිඳ සහ මව ඊයේ (04) දහවල් මරණකාරිණියගේ නිවසට පැමිණ ඇයට බැණ වදිමින්, පහර දී ඇති බවත් හෙළි ව තිබෙනවා.
පසුව සිත් තැවුලට පත් වූ කාන්තාව එම සිද්ධිය සිය ස්වාමියාට දූරකථන ඇමතුමක් ගෙන දන්වා ඇති අතර ඔහු රාජකාරියේ යෙදී සිටියදී, යළි නිවස වෙත පැමිණ ඇති බවයි වාර්තා වන්නේ.
කෙසේ නමුත් මරණකාරිණියගේ පෙරැත්තයට ඇයගේ ස්වාමියා යැයි පවසන පුද්ගලයා යළිත් රැකියාවට ගොස් තිබෙනවා.
ඒ මරණකාරිය දැඩි ලෙස රැකියාවට යන ලෙසට කළ බල කිරීමට අනුවයි.
කෙසේ නමුත් රැකියාවට යළි ගිය ද, සිතෙහි ඇති වූ සැකය මත මරණකාරිණියගේ ස්වාමියා යළිත් නිවසට පැමිණ තිබෙනවා.
එහිදී දැක ඇත්තේ සිය බිරිඳ කිසියම් දුගඳක් වහනය වන කෘෂිනාශක දියරයක් බී සිහිසුන්ව බිම ඇද වැටී ඇති බවයි.
කඩිනමින් ඇයව මුන්දලම රෝහලට ඇතුළත් කළ ද ඒ වනවිට ද ඇය ජීවිතක්ෂයට පත් ව සිටි බවයි වාර්තා වන්නේ.
තමන් නිවසට මුල් අවස්ථාවේ දී පැමිණෙන විටදීත් අදාළ අසල්වැසියන් දෙදෙනා සිය බිරිඳට බැණ වදිමින් සිටි බවට මරණකාරිණියගේ ස්වාමිපුරුෂයා පොලිසියට පවසා තිබෙනවා.
මේ අතර මරණකාරියට බැණ වැද පහර දුන්නා යැයි චෝදනා එල්ල වී සිටින අසල්වැසි කාන්තාව ද ඊයේ දහවල් පල්ලම පොලිසියට පැමිණිල්ලක් ද කර ඇති බවත් වාර්තා වනවා.
එහි දැක්වෙන්නේ අසල්වැසි කාන්තාවක් සමග සිය සැමියා අනියම් සබඳතාවක් පවත්වාගෙන යන බවටයි.
කෙසේවෙතත් මරණකාරිය මියගොස් ඇත්තේ වස ශරීරගත වීමෙන් ද නැතහොත්, ඇයගේ සිරුරේ පහරදීමෙන් ඇති වූ තැළුම් තුවාල හේතුවෙන් දැයි සොයා පශ්චාත් මරණ පරීක්ෂණයක් පැවැත්වීමට නියමිතයි.
පල්ලම පොලිසිය වැඩිදුර විමර්ශන සිදු කරනවා.
