වටවල පොලිස් වසමට අයත් වැලිඔය ප්රදේශයේ පදිංචිව සිටි 27 හැවිරිදි එක්දරු මවක් සිය සැමියා විසින් අද (17) දින අලුයම තියුණු ආයුධයකින් පහර දී ඝාතනය කර ඇති බව වටවල පොලිසිය පවසනවා.
මෙසේ ඝාතනට ලක්ව ඇත්තේ වටවල, වැලිඔය වත්තේ, යු.කේ.ඩී.කොටසේ සිය මවගේ නිවසේ පදිංචිව සිටි ශන්මුගනාදන් තිලකරාණි නැමති එක් දරු මවක්.
ඇය විදේශගතව සිට දැනට මාස 3කට ප්රථම සිය සැමියා පදිංචි ගලහා පුපුරැස්ස ප්රදේශයේ නිවසට පැමිණ ඇති අතර, මීට සති දෙකකට ප්රථම ඇය සිය දරුවාද සමග වැලිඔය වත්තට පැමිණ ආපසු නිවසට ගොස් නොමැති බවයි වාර්තා වන්නේ.
පසුව සැමියා විසින් ඇය පදිංචිව සිටි වතුයායට පැමිණ ඇය සම්බන්ධයෙන් තොරතුරු විමසිමේ දි ඇය එම වතුයායෙම තරුණයෙක් සමග අනියම් සම්බන්ධතාවයක් පවත්වාගෙන යන බවට එම වතුයායේ පදිංචි කිහිපදෙනෙක් විසින්
තොරතුරු ලබා දීමෙන් අනතුරුව උරණ වු සැමියා එම සම්බන්ධතාවය නතර කරන ලෙසට බිරිදට බැන වැදී තිබෙනවා.
ඒ අනුව මේ සම්බන්ධයෙන් දෙදෙනා අතර ඊයේ (16) දින පස්වරුවේ සිට බහින්බස්වීම් සිදු වී ඇති බවත්, පසුව ඇයව අද (17) අලුයම් කාලයේ නිදි යහනේදිම තියුණු ආයුධයකින් පහර දී ඝාතනය කර ඇති බවයි වටවල පොලිසිය සඳහන් කළේ.
ඝාතනය සම්බන්ධයෙන් වයස අවුරුදු 30ක් වූ සැකකරු සහ අනියම් පෙම්වතා වටවල පොලිසිය මගින් සැකපිට
අත්අඩංගුවට ගෙන ඇති අතර, එම සැකකරුවන් දෙදෙනා හැටන් මහේස්ත්රාත් අධිකරණය වෙත ඉදිරිපත් කිරීමට නියමිතයි.
ඝාතනය සම්බන්ධයෙන් වටවල පොලිසිය විසින් වැඩිදුර විමර්ශන සිදු කරනු ලබනවා.
