අන්තර් විශ්වවිද්‍යාල ශිෂ්‍ය බල මණ්ඩලයේ කැඳවුම්කරු වන මධුෂාන් චන්ද්‍රජිත් අත්අඩංගුවට ගෙන තිබෙනවා.
ඒ අද (10) පස්වරුවේ පවතින රජයට එරෙහිව මෙන් ම, ජාතික අධ්‍යාපන ප්‍රතිපත්ති රාමුවේ ඇතැම් කාරණා හා, පෞද්ගලික වෛද්‍ය විද්‍යාල ඉදිරිකිරීමට එරෙහිව කොළඹ කොටුව දුම්රිය ස්ථානය ඉදිරිපිට දී සිදු කළ විරෝධතාව මෙහෙයවීම හේතුවෙන් මොහුව අත් අඩංගුවට ගැනුණා.
කොටුව පොලිසිය විසින් සැකකාර චන්ද්‍රිජිත්ව අත් අඩංගුවට ගෙන ඇත්තේ 1981 අංක 15 දරන ජනාධිපතිවරයා තෝරා පත් කර ගැනීමේ 69 (අ) විධිවිධාන යටතේ මාර්ගයේ ගමන් කිරීම හෝ රථ වාහන ධාවනයට බාධා එල්ල කිරීම සම්බන්ධයෙන් පවතින නීති උල්ලංඝනය කිරීමේ වරදටයි.
විරෝධතාකරුවන් විසුරුවා හැරීමට පොලිසිය පැමිණි අතර උද්ඝෝෂකයින් හා පොලිසිය අතර ද උණුසුම් වචන හුවමාරුවක් හටගත්තා.
එම අවස්ථාවට මැතිවරණ කොමිෂන් සභාවේ නිලධාරියෙකු ද මැදිහත් වෙමින් පැවසුවේ; මැතිවරණයක් ප්‍රකාශ කළ අවස්ථාවක විරෝධතා පැවැත්වීම සිදු කළ නොහැකි බැවින් වහාම විසිර යාමට කටයුතු කරන ලෙසයි.
කෙසේවෙතත් ඒ පිළිබඳව තැකීමක් නොකර විරෝධතාකරුවන් ගමන් කිරීම හේතුවෙන් අන්තර් විශ්වවිද්‍යාල ශිෂ්‍ය බල මණ්ඩලයේ කැඳවුම්කරු අත්අඩංගුවට ගැනුණා.
විරෝධතාව අතරතුර පොලිසිය විසින් කැරලි මර්දන ඒකකය ද කැඳවා ඇති අයුරු දක්නට ලැබුණේ දෙපස මාර්ගයේ කඳුලු ගෑස් හා ජල ප්‍රහාරක රථ නවතා තිබීම හේතුවෙන්.
එවන් පසුබිමකදියි අන්තර් විශ්වවිද්‍යාල ශිෂ්‍ය බල මණ්ඩලයේ කැඳවුම්කරුව මෙලෙස අත්අඩංගුවට ගැනුණේ.
මෙම උද්ඝෝෂණය හේතුවෙන් කොටුව ඉදිරිපිට රථ වාහන ගමනාගමනයට දැඩි බාධා එල්ල ව තිබෙනවා.
