ශ්‍රී ලංකාව මුහුණ දී ඇති ආපදා තත්වයෙන් පීඩාවට පත් වී සිටින ජනතාව වෙත ලබාදීම සදහා එක්සත් අරාබි එමීර් රාජ්‍යයේ ආධාර රැගත් පළමු ගුවන් යානය ඊයේ මධ්‍යම රාත්‍රියේ කටුනායක ගුවන් තොටුපොළ වෙත පැමිණියා.
මෙම ගුවන් යානය තුළ විපතට පත් වී සිටින ජනතාව සදහා තාවකාලික නිවාස 48ක්, දින 14 කට එක් පවුලක් සදහා අවශ්‍ය ආහාර ඇසුරුම් 2,592ක්, කූඩාරම්, ගලවා ගැනීමේ භට කණ්ඩායම් සදහා යොදා ගන්නා වාහන, දුෂ්කර මාර්ගවල ධාවනය කළ හැකි යතුරුපැදි ආදී භාණ්ඩ විශාල තොගයක් පවතිනවා.
එක්සත් අරාබි එමීර් රාජ්‍යයේ ගුවන් හමුදාවට අයත් ලොව විශාලතම භාණ්ඩ ප්‍රවාහන ගුවන් යානයක් වන සී.-17 වර්ගයේ ගුවන් යානයක් අබුඩාබි නුවර සිට මෙම භාණ්ඩ තොගය රැගෙන පැමිණ තිබුණා.
තවත් මෙවැනිම ගුවන් යානා 03ක් ඉදිරි දින කීපය තුළදී කටුනායක ගුවන් තොටුපොළ වෙත එක්සත් අරාබි එමීර් රාජ්‍යයේ සිට පැමිණීමට නියමිත බවයි වාර්තා වුණේ.
මෙම ගුවන් යානය පැමිණි අවස්ථාවේ එය පිළිගැනීමට ශ්‍රී ලංකාවේ එක්සත් අරාබි එමීර් රාජ්‍යයේ නියෝජ්‍ය තානාපති රෂීඩ් අල් මසුරෝහි, ශ්‍රී ලංකා සිවිල් ගුවන් සේවා අධිකාරියේ අධ්‍යක්ෂ ජනරාල්වරයා මෙන්ම එහි ප්‍රධාන විධායක නිලධාරී කපිතාන් දමිත් රඹුක්වැල්ල, ආපදා කළමනාකරණ මධ්‍යස්ථානයේ නිලධාරීන් පිරිසක් සහ ශ්‍රී ලංකා යුද හමුදා නිලධාරීන් පිරිසක් ද කටුනායක ගුවන් තොටුපොළ වෙත පැමිණ සිටියා.
