රෝයල් පාක් මිනී මැරීමේ සිද්ධිය සම්බන්ධයෙන් මරණීය දණ්ඩනය නියම වී සිටි ජූඩ් ජයමහ යන අයට ලබාදුන් ජනාධිපති සමාව අහෝසි කිරීමෙන් අනතුරුව රුපියල් මිලියනයක වන්දියක් ගෙවන ලෙස අධිකරණය විසින් දුන් නියෝගය ක්රියාත්මක කිරීම පැහැර හැරීම සම්බන්ධයෙන් අප්රේල් මස 29 වන දා අධිකරණය හමුවේ පෙනී සිට හේතුව ඉදිරිපත් කරන ලෙස ශ්රේෂ්ඨාධිකරණය අද හිටපු ජනාධිපති මෛත්රිපාල සිරිසේනට නොතීසි නිකුත් කරනු ලැබුවා.
පසුගිය වසරේ ජුනි 06 වැනිදා කාන්තා හා මාධ්ය එකමුතුව සංවිධානය ගොනු කර තිබූ පෙත්සමක් විභාගයට ගත් ශ්රේෂ්ඨාධිකරණය රෝයල් පාක් ඝාතන විත්තිකරුට හිටපු ජනාධිපති මෛත්රිපාල සිරිසේන විසින් සමාව ප්රදානය කළ ආකාරය ආණ්ඩුක්රම ව්යවස්ථාවට පටහැනි බවට නිගමනය කරමින් අදාළ සමාව බල රහිත කරන බවට නියෝගයක් නිකුත් කළා.
එමෙන්ම එදින නඩුවේ තීන්දුව දුන් විනිසුරු මඬුල්ල විත්තිකරුට ජනාධිපති සමාව ලබාදීම තුළින් මූලික මිනිස් අයිතිවාසිකම් උල්ලංඝනය වී ඇති බව නිගමනය කරමින් ජනාධිපති සමාව ලබා දුන් එවකට ජනාධිපතිවරයා ලෙස කටයුතු කළ මෛත්රීපාල සිරිසේන හට රුපියල් මිලියනයක වන්දියක් නියම කළ අතර, එය මාසයක් තුළ ගෙවා අවසන් කරන ලෙස නියෝග ලරනු ලැබුවා.
ඒ, අනුව පෙත්සම අද (11) කැඳවූ අවස්ථාවේදී පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ සංජීව ජයවර්ධන සඳහන් කළේ මෛත්රිපාල සිරිසේන විසින් වන්දි මුදල මේ දක්වා ගෙවා නොමැති බවයි.
ඒ, අනුව එම කරුණු සලකා බැලූ විනිසුරු මඬුල්ල නියම කළ වන්දි ගෙවීම පැහැර හැරීම සම්බන්ධයෙන් අධිකරණය හමුවේ පෙනී සිට දඬුවම් නොකිරීමට හේතුව ඉදිරිපත් කරන ලෙස දන්වා මෛත්රිපාලි සිරිසේන වෙත නොතීසි නිකුත් කිරීමට නියෝග කළා.
රාජගිරිය රෝයල් පාර්ක් සුපිරි නිවාස සංකීර්ණයේ දී 2005 වසරේ ජූනි 30 වෙනිදා 19 හැවිරිදි ඉවෝන් ජොන්සන් නමැති තරුණිය ඝාතනය කිරීමේ චෝදනාවට වරදකරු කළ දොන් ශාමන්ත ජූඩ් ඇන්තනි ජයමහ යන අයට 2012 වසරේ හත්වැනි මස 11 වන දින අභියාචනාධිකරණය විසින් මරණීය දණ්ඩනය නියම කළා.
ඉන් පසුව 2019 වසරේ නව වැනි මස 11 වැනිදා විත්තිකරුට හිටපු ජනාධිපති මෛත්රීපාල සිරිසේන ජනාධිපති සමාව ලබාදුන් අතර එම ජනාධිපති සමාව පසුගිය වසරේ ජුනි 06 වැනිදා ශ්රේෂ්ඨාධිකරණය බල රහිත කළා.
Where is the other partner Ratanaya.