2023 යල කන්නයේ වී වගාව සඳහා අවශ්‍ය ජලය සැපයීමට වාරිමාර්ග දෙපාර්තමේන්තුව හා මහවැලි අධිකාරිය එකඟත්වය පළ කළ බව කෘෂිකර්ම දෙපාර්තමේන්තුව පවසනවා.
මීළඟ යල කන්නයේ වගා කටයුතු සඳහා ජලය ලබා දීම සම්බන්ධව කෘෂිකර්ම දෙපාර්තමේන්තුව, මහවැලි අධිකාරිය හා වාරිමාර්ග දෙපාර්තමේන්තුව විසින් සාකච්ඡාවක් පවත්වන ලද අතර එම සාකච්ඡාවේ දී මේ සඳහා එකඟත්වය පළ කළ බවයි කෘෂිකර්ම දෙපාර්තමේන්තුවේ අධ්‍යක්ෂ ජනරාල් මාලතී පරසුරාමන් මහත්මිය සඳහන් කළේ.
මහ කන්නයේ වී වගා කටයුතු මේ වනවිට අවසන්ව ඇති අතර බොහෝ ප්‍රදේශවල අස්වනු නෙළමින් පවතිනවා.
පසුගිය දිනවල පැවැති වර්ෂාවත් සමග සුළු වාරිමාර්ග, මහා වාරිමාර්ග හා මහවැලි අධිකාරිය යටතේ පවතින ජලාශ හා වැව්වල වගාවට අවශ්‍ය තරම් ජලය පවතින බව එම නිලධාරින් පවසන ලද බවත්, ඔවුන් විසින් වී වගාවට අවශ්‍ය ජලය ලබා දීමට එකඟත්වය පළ කරන ලද බවත් අධ්‍යක්ෂ ජනරාල්වරිය ප්‍රකාශ කළා.
කෙසේ වුව ද යල කන්නයේ දී අතිරේක බෝග වගාවට ද ගොවි ජනතාව උනන්දු කරවන ලෙස කෘෂිකර්ම අමාත්‍ය මහින්ද අමරවීර මහතා කෘෂිකර්ම දෙපාර්තමේන්තුවට උපදෙස් දී තිබෙනවා.
පසුගිය යල කන්නයේ වී වගාව සාර්ථක වීම මෙන්ම මෙවර මහ කන්නයේ දී වී මෙට්‍රික් ටොන් මිලියන 2.6ක අස්වැන්නක් ලැබෙනු ඇති බවට කෘෂිකර්ම දෙපාර්තමේන්තුව විසින් ඉදිරිපත් කර තිබෙන පුරෝකථන අනුව යල කන්නයේ වී වගා කිරීම මෙන්ම අනෙකුත් බෝග වගාවට අවධානය යොමු වී තිබෙනවා.
ඒ අනුව බඩඉරිඟු, තල, මිරිස්, ලූණු, මුං, කව්පි හා උඳු වැනි අතිරේක බෝග වගාවන්ට අවශ්‍ය පොහොර හා බිම් සකස් කිරීමට රුපියල් 70,000ක ණය මුදලක් ගොවි ජනතාවට අවම පොලියක් යටතේ ලබා දීමට කෘෂිකර්ම අමාත්‍යාංශයට අනුබද්ධ විදේශීය ව්‍යාපෘතියක් වන SAPP- Small Scale Agriculture Participation Project යටතේ කටයුතු යොදා ඇතැයි සඳහන්.
