බෙයාර්ස්ටෝව්ගේ දැවීයාමේ සිද්ධිය එංගලන්ත අගමැති දක්වා දුරයයි (වීඩියෝ)

අළුබඳුන ටෙස්ට් ක්‍රිකට් තරගාවලියේ දෙවන තරග අතර තුර සිදුවූ එංගලන්ත පිතිකරු ජොනී බෙයාර්ස්ටෝව්ගේ දැවීයාම මේ වනවිට බොහෝ දෙනෙකුගේ අවධානයට ලක්වූ සිදුවීමක් බවට පත්ව තිබෙනවා.

මෙම ආන්දෝලනාත්මක සිදුවීම මේ වනවිට බ්‍රිතාන්‍ය අග්‍රාමාත්‍ය රිෂි සුනක් දක්වාම දුරගොස් ඇති බවයි විදෙස් මාධ්‍ය වාර්තා කළේ.

ඕස්ට්‍රේලියානු ක්‍රීඩකයින් විසින් ලබාගත් බෙයාර්ස්ටෝව්ගේ දැවීයාම සම්බන්ධයෙන් බ්‍රිතාන්‍ය අගමැතිවරයා විශේෂ ප්‍රකාශයක් ද සිදුකර ඇති බව ද සඳහන්.

ඒ, අනුව බෙයාර්ස්ටෝව්ගේ දුවද්දී දැවී යාමේ සිද්ධිය ඕස්ට්‍රේලියාව ක්‍රිකට් ක්‍රීඩාවේ ජීවගුණය අනුගමනය නොකළ සිදුවීමක් බවයි අගමැති රිෂි සුනක් චෝදනා කර ඇත්තේ.

එංගලන්තය සහ ඕස්ට්‍රේලියාව අතර අළුබඳුන ටෙස්ට් තරගාවලියේ දෙවන තරගය ලකුණු 43කින් ජය ගැනීමට ඕස්ට්‍රේලියානු කණ්ඩායමට පෙරේදා හැකියාව ලැබුණා.

කෙසේ වෙතත් එංගලන්ත පිතිකරු ජොනී බෙයාර්ස්ටෝව්ගේ කඩුල්ල ඕස්ට්‍රේලියා ක්‍රීඩකයින් ලබාගත් ආකාරය පිළිබඳව ඕස්ට්‍රේලියානු කණ්ඩායමට එල්ල වී ඇත්තේ දැඩි අප්‍රසාදයක්.

එංගලන්ත දෙවන ඉනිමේ ලකුණු 10ක් ලබාගෙන සිටි බෙයාර්ස්ටෝව්, කැමරන් ග්‍රීන් යැවූ බවුන්සර් පන්දුවක් හමුවේ හිස පහත් කරමින් පන්දුව කඩුලු රකින්නා අතට යෑමට සලස්වමින් ආරක්ෂා වී තම ක්‍රීස් එකෙන් ඉවතට පැමිණෙනවා.

එහිදී ඕස්ට්‍රේලියානු කඩුලු රකින ක්‍රීඩක ඇලෙක්ස් කේරී එම පන්දුව කඩුල්ල දෙසට දමා ගසන අතර එය කඩුල්ලේ වැදීමෙන් පසු බෙයාර්ස්ටෝව් දැවී ගිය ක්‍රීඩකයෙකු ලෙස ඕස්ට්‍ර්ලියානු ක්‍රීඩකයින් ඉල්ලා සිටිනවා.

කෙසේ වෙතත් පිටියේ විසිනුරුවරුන් එම තීරණය ලබාදීම තෙවැනි විනිසුරුවරයා වෙත භාරදෙන අතර, රූපවාහිනී විනිසුරු මාරයිස් ඉරැස්මස්ගේ සමාලෝචනයෙන් පසු ජොනී බෙයාර්ස්ටෝව් දැවීගිය ක්‍රීඩකයෙකු ලෙස නම්කරනු ලබනවා.

එම අවස්ථාවේ දී ලෝර්ඩ්ස් පිටියේ තරග නරඹමින් සිටි දහස් සංඛ්‍යාත එංගලන්ත ප්‍රේක්ෂකයින් බෙයාර්ස්ටෝව් දැවීගිය ක්‍රීඩකයෙකු ලෙස නම්කිරීම පිළිබඳව දැඩි අප්‍රසාදය පළකර සිටි ආකාරය දැකගත හැකි වුණා.

අදාළ සිදුවීම පහතින්.

https://www.facebook.com/watch/?v=787790459497613