රුපියල් තුන් කෝටි එකොළොස් ලක්ෂ හැත්තෑ දහසක් වටිනා කුෂ් මත්ද්‍රව්‍ය තොගයක් මෙරටට රැගෙන විත්, ඒවා කටුනායක ගුවන් තොටුපොළ ව්‍යාපාරිකයන් සඳහා වූ රක්ත මාවත ( Red Channel ) ඔස්සේ පිට කර ගෙන යාමට තැත් කළ ශ්‍රී ලාංකික ගුවන් මගියෙකු අද (16) දින උදෑසන ගුවන් තොටුපොළ රේගු නිලධාරීන් විසින් අත්අඩංගුවට ගනු ලැබුවා.
සැකකරු මට්ටක්කුලිය ප්‍රදේශයේ පදිංචි, කරත්තයක් භාවිතා කරමින් එළවළු වෙළදාමේ නිරත 48 හැවිරිදි ව්‍යාපාරිකයෙක්.
මෙම මත්ද්‍රව්‍ය තොගය සමග තුනට නවන කුඩ 50 ක් ද තායිලන්තයෙන් මිල දී ගෙන, ඒවා අතරින් කුඩ 20ක් ඇසුරුම් තුළින් ඉවත් කර, එම ඇසුරුම් තුළට මෙම කුෂ් මත්ද්‍රව්‍ය පුරවා රැගෙන විත් තිබූ බවයි ගුවන්තොටුපොළ වාර්තාකරු පැවසුවේ.
සැකකරු රේගු නිලධාරීන්ගේ අවධානය වෙනතකට යොමු කිරීමට, තායිලන්තයේ බැංකොක් නුවර සිට ඉන්දියාවේ මුම්බායි නුවර වෙත පැමිණ, එතැන් සිට අද උදෑසන 10.00ට ඉන්ඩිගෝ ගුවන් සේවයේ 6.ඊ.- 1185 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබූ බවත් සඳහන්.
කුඩ 20ක් අඩංගු ඇසුරුම් තුළ කුෂ් මත්ද්‍රව්‍ය කිලෝග්‍රෑම් 03යි ග්‍රෑම් 117ක් සඟවා ගෙන තිබූ බවත්, ඒවා අත්අඩංගුවට ගෙන විවෘත කළ පසු දැඩි මත්ද්‍රව්‍ය දුර්ගන්ධයක් ගුවන් තොටුපොළ පරිශ්‍රය තුළ පැතිර යන්නට වූ බවත් වාර්තා වනවා.
අත්අඩංගුවට ගත් ගුවන් මගියා සහ මත්ද්‍රව්‍ය තොගය ගැන වැඩිදුර විමර්ශන කටයුතු සදහා කටුනායක ගුවන් තොටුපොළ පොලිස් මත්ද්‍රව්‍ය කාර්යාංශයේ නිලධාරීන් වෙත භාර දීමට පියවර ගෙන තිබෙනවා.
