ජනාධිපති අනුර කුමාර දිසානායක සහ තායිලන්ත තානාපති පයිටුන් මහපන්නපොන් (Paitoon Mahapannaporn) අතර විශේෂ හමුවක් ඊයේ (09) පැවැත්වුණා.
ජනාධිපති ලේකම් කාර්‍යාලය නිවේදනය කළේ පසුගිය ජනාධිපතිවරණ ජයග්‍රහණය වෙනුවෙන්
තායි තානාපතිවරයා සහ තායිලන්ත රජයේ සුබපැතුම් පිරිනැමීමට හෙතෙම පැමිණ සිටි බවයි.
මහපන්නපොන් මහතා තායිලන්තයේ මහා වජිරලොන්කොන් රජු විසින් එවනු ලැබූ විශේෂ සුබ පැතුම් පණිවිඩය ද ජනාධිපතිවරයා වෙත පිළිගැන්වුවා.
ශ්‍රී ලංකාවේ නව පාලනය පිළිබඳව ද මෙහිදී සිය ප්‍රසාදය පළ කළ ඔහු නව රජය කෙරෙහි ජනතාව තබා ඇති විශ්වාසය සහ අපේක්ෂාවන් යථාර්ථයක් බවට පත් කරලීම සඳහා තායිලන්ත රජයේ සහාය ලබා දෙන බව ද ප්‍රකාශ කළා.
ශ්‍රී ලංකාව සහ තායිලන්තය අතර මෑතක දී අත්සන් තබන ලද නිදහස් වෙළඳ ගිවිසුමේ (FTA) ප්‍රතිලාභ පිළිබඳව ද මෙහිදී කරුණු සඳහන් කළ ඔහු එය අන්‍යෝන්‍ය වශයෙන් ආර්ථිකමය වාසි ගෙන දෙන බව ද අවධාරණය කළ බවයි වාර්තා වන්නේ.
ශ්‍රී ලංකාව තුළ තායිලන්ත ආයෝජන ඉහළ නැංවීම සඳහා, විශේෂයෙන් දේශීය පලතුරු සහ නිෂ්පාදන සැකසීම සහ අපනයනය පිළිබඳව ද මෙහිදී අවධානය යොමු කෙරුණා.
තායිලන්තයේ සංචාරක කර්මාන්තයේ සාර්ථකත්වයට ඉවහල් වූ විශේෂඥතාව පිළිබඳව ද මෙහි දී ජනාධිපතිවරයාව දැනුවත් කළ තායිලන්ත තානාපතිවරයා සංචාරක කර්මාන්තය ප්‍රවර්ධනයේ දී ශ්‍රී ලංකාව සමඟ සහයෝගයෙන් කටයුතු කිරීමට ද කැමැත්ත පළ කළ බවයි වාර්තා වන්නේ.
