අසැබි වීඩියෝ රූගතකර අන්තර්ජාලයට එක් කළ අඹුසැමි යුවළ අද අධිකරණයට

වැඩිහිටියන්ට පමණක් වූ අසභ්‍ය වෙඩ් අඩවියක‍ට, අසභ්‍ය වීඩියෝ දර්ශන උඩුගත කළ සිද්ධියකට අත්අඩංගුවට ගැනුණු යුවළ අද (09) දිනයේ අලුත්කඩේ මහේස්ත්‍රාත් අධිකරණයට ඉදිරිපත් කිරීමට නියමිතව තිබෙනවා.

මිරිහාන පොලිසියේ ළමා හා කාන්තා කාර්යාංශය මගින් ඊයේ (08) මෙලෙස අත්අඩංගුවට ගැනුණු යුවළ රාජගිරිය ප්‍රදේශයේ පදිංචි වයස අවුරුදු 37 හා 36 යන වයස්වල පසුවන විවාහක යුවළක්.

මොවුන්ගෙන් සැමියා පරිඝණක ඉංජිනේරුවරයෙක් වන අතර බිරිඳ මනෝ විද්‍යා උපදේශකවරියක් බවයි වාර්තා වන්නේ.

ශ්‍රී ලාංකීය යුවළක් පෙනී සිටින අසභ්‍ය වීඩියෝ දර්ශන එංගලන්තය කේන්ද්‍ර කරගත් වැඩිහිටියන්ට පමණක් වූ වෙබ් අඩවියක විකාශය වන බවට නුගේගොඩ කොට්ඨාශය භාර ජ්‍යෙෂ්ඨ පොලිස් අධිකාරී මංගල දෙහිදෙණියට ලද තොරතුරකට අනුව විමර්ශන අරඹා තිබෙනවා.

ඒ, අනුවයි සැකකාර යුවළ රාජගිරිය ප්‍රදේශයේ තෙමහල් ගොඩනැගිල්ලක ඉහළ මහලේ පදිංචිව සිටිය දී මෙලෙස අත්අඩංගුවට ගෙන ඇත්තේ.

මෙම යුවළ අදාළ වැඩිහිටියන්ට පමණක් වූ වෙබ් අඩවියට වීඩියෝපට 334ක් උඩුගත කර ඇති බවට අනාවරණය වී තිබෙනවා.

සිද්ධිය සම්බන්ධ වැඩිදුර විමර්ශන මිරිහාන පොලිසියේ ළමා හා කාන්තා කාර්යාංශය මගින් සිදුකරනු ලබනවා.