අපොස උසස් පෙළ විභාගය හෙට – විභාගයට සියල්ල සූදානම් (වීඩියෝ)

2025 වර්ෂයට අදාළ අධ්‍යයන පොදු සහතික පත්‍ර උසස් පෙළ විභාගය හෙට (10) ආරම්හ වනවා.

විභාගය වෙනුවෙන් අවශ්‍ය සියලුම කටයුතු සූදානම් බවයි විභාග දෙපාර්තමේන්තුව සඳහන් කළේ.

ඒ, අනුව උසස් පෙළ විභාගයේ සියලු ප්‍රශ්න පත්‍ර විභාග මධ්‍යස්ථානවලට භාර දී ඇති බවයි එම දෙපාර්තමේන්තුව පැවසුවේ.
දිවයින පුරා ස්ථාපිත කර ඇති විභාග මධ්‍යස්ථාන 2362 කදී මෙවර විභාගය පැවැත් වෙනවා.

එමෙන්ම සම්බන්ධීකරණ මධ්‍යස්ථාන 325ක් සහ ප්‍රාදේශීය එක් රැස්කිරීමේ මධ්‍යස්ථාන 32ක් ද ක්‍රියාත්මකයි.

විභාග මධ්‍යස්ථානවලට අවශ්‍ය ආරක්ෂාව සඳහා පොලිස් නිලධාරීන් ද යොදවා ඇති බවයි විභාග දෙපාර්තෙමන්තුව පැවසුවේ.

මෙවර උසස් පෙළ විභාගය සඳහා විභාග අපේක්ෂකයින් 340,525 දෙනෙකු සුදුකම් ලබා සිටිනවා.

මේ අතර මෙවරත් විශේෂ අවශ්‍යතා ඇති දරුවන්ටත් විභාගය සඳහා විශේෂ පහසුකම් සලසාදීමට කටයුතු සූදානම් කර ඇති බව විභාග කොමසාරිස් ජනරාල් ඉන්දිකා කුමාරි ලියනගේ පවසනවා.

එමෙන්ම යම් ආපදා තත්ත්වයක් ඇති වූවහොත් ආපදා කළමනාකරණ මධ්‍යස්ථානයේ සහාය ලබාගැනීමට බලාපොරොත්තු වන බව ද විභාග කොමසාරිස් ජනරාල්වරිය සඳහන් කළා.

යම් ආපදා තත්ත්වයක් ඇතිවුවහොත් එවැනි තොරතුරු 117 අංකයෙන්, ආපදා කළමනාකරණ මධ්‍යස්ථානයට දැනුම්දිය හැකි අතර, 1911 අංකයෙන් ද, විභාග දෙපාර්තමේන්තුවට දැනුම්දීමේ හැකියාව පවතිනවා.

එමෙන්ම ආපදා කළමනාකරණ මධ්‍යස්ථානයේ හදිසි මෙහෙයුම් මැදිරියේ ස්ථාපිත ජාතික විභාග හදිසි මෙහෙයුම් ඒකකයට ද, 0113 668026 සහ 0113 668032 යන දුරකථන අංක අමතා දැනුම් දිය හැකියි.

අධ්‍යයන පොදු සහතික පත්‍ර උසස් පෙළ විභාගය හෙටින් (10) ආරම්භ වන අතර, විභාගය දෙසැම්බර් 05 වනදා අවසන් වනවා.