ඉල්ලීම් කිහිපයක් මුල් කරගනිමින් ග්රාම නිලධාරීන් විසින් ආරම්භ කර තිබූ වෘත්තිය ක්රියාමාර්ගය සඳහා විසඳුම් ලබාදීමට රජය අපොහොසත් වීම හේතුවෙන් අද (15) දිනයේ සිට සෙනසුරාදා දිනවල රාජකාරිවලින් ඉවත් වීමට සියලුම ග්රාම නිලධාරීන් තීරණය කර තිබෙනවා.
ශ්රී ලංකා ග්රාම නිලධාරීන්ගේ සංගමයේ ප්රධාන ලේකම් නෙවිල් විජේරත්න මාධ්ය වෙත සඳහන් කළේ, නැවත දැනුම්දෙනතුරු සෙනසුරාදා දින රාජකාරිවලින් ඉවත්වීමට ග්රාම නිලධාරීන් තීරණය කර ඇති බවයි.
ගමන් වියදම් දීමනාව ඉහළ දැමීම, උපාධිය අවම සුදුසුකම බවට පත් කිරීම, ග්රාම නිලධාරීන්ගේ දීමනා ඇතුළත් ගම්මන්පිල කමිටුව විසින් නිර්දේශ කරන ලද කැබිනට් මණ්ඩලය විසින් අනුමත කරන ලද දීමනා ලබාගැනීම, සෙනසුරාදා ඇතුළු රජයේ නිවාඩු දිනවල සිදුකරන සේවය වෙනුවෙන් දිනක වැටුප ලබාගැනීම ඇතුළු ඉල්ලීම් කිහිපයක් මුල්කරගනිමින් පසුගිය 10 සහ 11 යන දෙදින තුළ සියලුම ග්රාම නිලධාරීන් අසනීප නිවාඩු දමා රාජකාරීවලින් වැළකී සිටියා.
