කළුතර, නාගොඩ ප්‍රදේශයේ පිහිටි අවන්හලක් ඉදිරිපිට අද (09) උදෑසන සිදුවූ වෙඩිතැබීමේ සිද්ධිය පිළිබඳව තොරතුරු රැසක් මේ වනවිට අනාවරණය වී තිබෙනවා.
මෙම වෙඩි තැබීමෙන් අවන්හලේ හිමිකරුවන වයස අවුරුදු 54ක පුද්ගලයෙක් එම ස්ථානයේ දීම මිය ගිය අතර, අවුරුදු 52ක ඔහුගේ බිරිඳ බරපතළ තුවාල ලබා නාගොඩ ශික්ෂණ රෝහල වෙත ඇතුළත් කෙරුණා.
සිදුකරන ලද මූලික විමර්ශනවල දී මෙම වෙඩිතැබීම පිටුපස දොඩංගොඩ ධනුක සහ කළුතර නවීන් නැමැති සංවිධානාත්මක අපරාධකරුවන් සිටින බවට තොරතුරු අනාවරණය වී තිබෙනවා.
වෙඩි ප්‍රහාරයෙන් මියගිය පුද්ගලයා සංවිධානාත්මක අපරාධකරුවෙකු වන දොඩංගොඩ ධනුකගේ මුදල් එකතු කිරීම සිදුකර ඇති අතර එහිදී ඔහු විසින් මුදල් වංචාවක් සිදුකර ඇති බව යි හෙළිව ඇත්තේ.
ඊට පළිගැනීමක් ලෙස දොඩංගොඩ ධනුක සහ කළුතර නවීන් එක්ව මෙම වෙඩි තැබීම සැලසුම්කර ඇති බව අනාවරණය වී තිබෙනවා.
යතුරුපැදියකින් පැමිණි නාඳුනන තුවක්කුකරුවන් දෙදෙනෙකු විසින් අද (09) උදෑසන 7.30ට පමණ T 56 වර්ගයේ ගිනි අවියකින් මෙම වෙඩි තැබීම සිදුකර පලාගොස් ඇති බව කළුතර දකුණ මූලස්ථාන පොලිසිය සඳහන් කළා.
සිද්ධිය සම්බන්ධයෙන් කළුතර අපරාධ කොට්ඨාසය, කොට්ඨාස අපරාධ විමර්ශන ඒකකය, අපරාධ ස්ථාන පරීක්ෂණාගාර නිලධාරින් සහ කළුතර දකුණ මූලස්ථාන පොලිසිය එක්ව වැඩිදුර විමර්ශන සිදුකරනු ලබනවා.
