කන්දකාඩු පුනරුත්ථාපන මධ්‍යස්ථානයේ දී රැඳවියෙකු මියයාමේ සිද්ධිය සම්බන්ධයෙන් සිව්දෙනෙකු අත්අඩංගුවට ගෙන ඇති බව පොලිසිය පවසනවා.
පොලිස් ,මාධ්‍ය කොට්ඨාශය විසින් විශේෂ නිවේදනයක් නිකුත් කරමින් මේ බව දන්වා තිබෙනවා.
ඒ අනුව අදාල සිද්ධිය සම්බන්ධයෙන් යුද හමුදා සාමාජිකයින් දෙදෙනෙකු සහ ගුවන් හමුදා සමාජිකයින් දෙදෙනෙකු මෙලෙස අත්අඩංගුවට ගත් බවයි පොලීසිය වැඩිදුරටත් පවසන්නේ.
ඔවුන් සිව්දෙනා ඊයේ (01) දිනයේ දී අත්අඩංගුවට ගෙන ඇති බවයි වාර්තා වුණේ.
රැඳවියෙකු මියයාමේ සිද්ධියක් හේතුවෙන් කන්දකාඩු ප්‍රතිකාර හා පුනරුත්ථාපන මධ්‍යස්ථානයේ පසුගිය 28 රාත්‍රියේ සිට උණුසුම්කාරී තත්ත්වයක් හටගත්තා.
එහිදී එහි රඳවා සිටි රැඳවියන් 600කට වැඩි දෙනෙකු පසුගිය 29 වෙනිදා උදෑසන පළාගොස් තිබුණා.
පසුව යුද හමුදාව සහ පොලීසිය එක්ව ඔවුන් සොයා මෙහයුම් දියත් කළා.
එහිදී පළාගිය රැඳවියන් 679 දෙනෙකු අත්අඩංගුවට ගැනීමෙන් සහ භාරවීමෙන් අනතුරුව අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාර ගතකර තිබෙනවා.
පළාගිය රැඳවියන්ගෙන් තවත් 44 දෙනෙකු අත්අඩංගුවට ගැනීමට තවදුරටත් මෙහෙයුම් ක්‍රියාත්මක බවයි පොලිසිය වැඩිදුරටත් පැවසුවේ.
