මේ වනවිට යුරෝපයේ රටවල් කිහිපයක ව්‍යාප්ත වෙමින් පවතින මන්කිපොක්ස් හෙවත් වඳුරු උණ වසංගතය කෙරෙහි විද්‍යාඥයින්ගේ දැඩි අවදානය යොමුව තිබෙනවා.
මෙම දුර්ලභ ගණයේ රෝගය හේතුවෙන් ලෝක සෞඛ්‍ය සංවිධානය හදිසි රැස්වීමක් ද කැඳවා ඇති බවයි විදෙස් මාධ්‍ය වාර්තා කරන්නේ.
කෙසේ වෙතත් මෙම වසංගතය සම්බන්ධයෙන් ලෝක සෞඛ්‍ය සංවිධානය දැඩි අවදානයකින් කටයුතු කරන බවයි විදෙස් වාර්තා වැඩිදුරටත් වාර්තා කළේ.
මේ වනවිට ජර්මනිය, ප්‍රංශය, බෙල්ජියම, ඉතාලිය, නෙදර්ලන්තය, පෘතුගාලය, ස්පාඤ්ඤය, ස්වීඩනය, එක්සත් රාජධානිය, ඇමරිකාව, කැනඩාව, ඕස්ට්‍රේලියාව ආදී රටවලින් වඳුර උණ ආසාදිතයින් හඳුනාගෙන ඇති බවයි වාර්තා වන්නේ.
දැනට යුරෝපයේ ව්‍යාප්ත වෙමින් පවතින මෙම රෝග වෛරසය සමාජ සම්ප්‍රේෂණය දක්වා ඉහළ ගොස් තිබෙන බවට වෛද්‍යවරුන් සැක පළ කරනවා.
මන්කිපොක්ස් රෝගය පළමු වරට 1970 වර්ෂයේදී මිනිසෙකුට ආසාදනය වූ බවට හඳුනා ගනු ලැබූ අතර එය අප්‍රිකානු මහද්වීපය ආශ්‍රිතව මුල් වරට හඳුනා ගනු ලැබුවා.
මෙය වඳුරන්ගෙන් ව්‍යාප්තවන වෛරසයක් ඇසුරෙන් ඇතිවන රෝගයක් බවයි විද්‍යාඥයින් සඳහන් කරන්නේ.
