නිවසකට ඇතුළුවු කොල්ලකරුවන් දෙදෙනෙක් නිවසේ සිටි කාන්තාවක් මරාදමයි

මල්වතුහිරිපිටිය පිටුවල්ගොඩ ප්‍රදේශයේ නිවසකට ඇතුළුවු කොල්ලකරුවන් දෙදෙනෙක් නිවසේ සිටි කාන්තාවන් දෙදෙනෙකුට කළ පහර දීමකින් එක් කාන්තාවක් මිය ගොස් ඇත.

ඊයේ (09) අලුයම එම කොල්ලකරුවන් දෙදෙනා නිවසට ඇතුළු වී නිවසේ සිටි කාන්තාවන් දෙදෙනාට පහර දී, අත් පා බැඳ දමා නිවසේ තිබු දේපළ කොල්ලකෑමට තැත් කර තිබේ.

කොල්ලකරුවන් නිවසෙන් පිටව ගිය පසුව 119 දුරකථන අංකය ඔස්සේ පොලිස් තොරතුරු මධ්‍යස්ථානයට කළ දැනුම් දීමෙන් අනතුරුව මල්වතුහිරිපිටිය පොලීසිය විමර්ශන ආරම්භ කර ඇත.

පහරදීම හේතුවෙන් සිහිසුන් වු එක් කාන්තාවක් ගම්පහ රෝහලට ඇතුළත් කිරීමෙන් පසු මිය ගොස් තිබේ.

එලෙස මිය ගොස් ඇත්තේ 77 හැවිරිදි පිටුවල්ගොඩ යක්කල ප්‍රදේශයේ පදිංචිව සිටි කාන්තාවකි.

සැකකරුවන් අත්අඩගුවට ගැනීම සඳහා මල්වතුහිරිපිටිය පොලීසිය වැඩිදුර විමර්ශන සිදුකරයි.

මේ අතර, දඹුල්ල කලෝගහඇල ප්‍රදේශයේ නිවසක තිබී 14 හැවිරිදි දැරියකගේ මළ සිරුරක් සොයාගෙන තිබේ.

කලෝගහඇල ප්‍රදේශයේ නිවසක, ඝාතනය කළ දැරියකගේ මළ සිරුරක් තිබෙන බවට ලද තොරතුරු මත දඹුල්ල පොලීසිය විමර්ශන ආරම්භ කර ඇත.

මෙලෙස මියගොස් ඇත්තේ දඹුල්ල අතුපාරයාය ප්‍රදේශයේ පදිංචිව සිටි දැරියකි.

පසුගිය 6වනදා අසල්වාසී නිවසක සිටි පුද්ගලයෙක් විසින් ඔහුගේ දියණියට ඉගැන්වීමේ කටයුතු කිරීම සඳහා පවසමින් එම මිය ගිය දැරියව යතුරු පැදියෙන් රැගෙන ගොස් ඇත.

පසුව සිය දියණිය නිවසට නොපැමිනීම හේතුවෙන් ඇයගේ දෙමාපියන් විසින් පසුගිය 7වනදා අදාළ පුද්ගලයා සිටි නිවසට ගොස් තිබේ.

එම නිවසේ කිසිවෙකුත් නොමැතිවීම හේතුවෙන් එම පිරිස මීට මාස 2කට පමණ පෙර කුලියට ගෙන පදිංචිව සිටි නිවසකට ගොස් ඇත.

එම නිවසද අගුළුදමා තිබීම හේතුවෙන් දෙමාපියන් මේ සම්බන්ධයෙන් දඹුල්ල පොලීසියට පැමිණිලි කර තිබේ.

ඒ අනුව ඊයේ (09) කුලියට නැවති සිටි නිවස පරීක්ෂා කිරීමේදී එම නිවසේ ඇඳක් මත තිබී දැරියගේ මළ සිරුර සොයාගෙන ඇත.

දැරිය රැගෙන ගිය සැකකරු සහ ඔහුගේ බිරිඳ මේ වන විට ප්‍රදේශයෙන් පළා ගොස් ඇති අතර ඔවුන් අත්අඩංගුවට ගැනීමට දඹුල්ල පොලීසිය විමර්ශන සිදුකරයි