නුවරඑළිය, මීපිලිමාන ප්‍රදේශයේ කුලී පදනම මත ලබාගත් නිවසක රැඳී සිටි අඹුසැමි යුවළක් අද (03) අලුයම විෂ වායුවක් ආග්‍රහණය වීමෙන් ජීවිතක්ෂයට පත්ව තිබෙනවා.
නුවරඑළිය කොට්ඨාස භාර සහකාර පොලිස් අධිකාරී චන්දන බස්නායක පැවසුවේ, අවිස්සාවේල්ල ප්‍රදේශයේ පදිංචි මෙම යුවළ නුවරඑළිය, මීපිලිමාන ප්‍රදේශයේ සංචාරක හෝටලයක ඉදිකිරීම් කටයුතු සිදුකරන බවයි.
එම සංචාරක හෝටලය ඉදිකරන තෙක් ඒ අසලම තාවකාලිකව කුලී පදනම මත නිවසක් ලබා ගෙන එහි රැඳී සිට ඇති බවයි සහකාර පොලිස් අධිකාරීවරයා පැවසුවේ.
නුවරඑළිය ප්‍රදේශයේ පවතින අධික සීතලත් සමඟ බාබකිව් (BBQ) උදුණක් දල්වා එය කාමරයේ තබා ගනිමින් මෙම යුවළ නින්දට ගොස් ඇති බව අනාවරණය වී තිබෙනවා.
අද (02) අලුයම ඔවුන්ගේ දුරකථනවලට ඥාතීන් ඇමතුම් ලබා ගෙන ඇතත්, එම ඇමතුම්වලට ප්‍රතිචාර නොදැක්වීම නිසා ඥාතීන් ප්‍රදේශයේ ග්‍රාම නිලධාරිවරයාට ඒ බව දැනුම්දීමෙන් පසු ඔහු නිවසට ගොස් පරීක්ෂා කිරීමේදී අඹුසැමි යුවළ මිය ගොස් ඇති බවට සැලවීමත් සමග ග්‍රාම සේවා නිලධාරිවරයා විසින් ඒ බව නානුඔය පොලීසිය වෙත දැනුම් දීමට කටයුතු කර ඇති බවයි වාර්තා වුණේ.
මියගිය පිරිමි පුද්ගලයා නැවක කපිතාන්වරයෙකු බවත්, ඔහු 52 හැවිරිදි වියේ සහ ඔහුගේ බිරිඳ 46 හැවිරිදි වියේ පසුවන බව නානුඔය පොලීසිය සඳහන් කළා.
