චීනය වෙත ඉරාන බොරතෙල් ප්රවාහනය කිරීම සහ විකිණීම සම්බන්ධයෙන් සෘජුවම දායකත්වය සපයන ලද පුද්ගලයන් සහ ආයතන 12 කට එරෙහිව සම්බාධක පැනවීමට ඇමෙරිකානු එක්සත් ජනපදය කටයුතු කර තිබෙනවා.
ඇමෙරිකානු මූල්ය දෙපාර්තමේන්තුවේ විදේශ වත්කම් පාලන කාර්යාලය (OFAC) විසින් මෙම තීරණය ගෙන ඇති බවයි වාර්තා වන්නේ.
ඉරානයේ “ඉස්ලාමීය විප්ලවීය ආරක්ෂක බළකාය” (IRGC) විසින් සිදු කරනු ලබන නීති විරෝධී තෙල් වෙළඳාමට සහාය දැක්වීම මෙම ආයතනවලට එල්ල වී ඇති ප්රධාන චෝදනාව වනවා.
ඇමෙරිකානු මූල්ය දෙපාර්තමේන්තුව පෙන්වා දෙන්නේ ඉරාන පාලන තන්ත්රය සිය රහසිගත භූමිකාවන් වසා ගැනීම සඳහා විවිධ රටවල ව්යාජ සමාගම් ජාලයන් උපයෝගී කරගන්නා බවයි.
මෙම තෙල් වෙළඳාමෙන් ලැබෙන බිලියන සංඛ්යාත ආදායම, ආර්ථික අපහසුතාවලින් පීඩා විඳින ඉරාන ජනතාවගේ සුබසාධනය වෙනුවෙන් යෙදවීම වෙනුවට, ත්රස්තවාදී කණ්ඩායම්වලට අරමුදල් සැපයීමට, අවි ආයුධ නිෂ්පාදනයට සහ වැසියන්ගේ සිවිල් නිදහස මර්දනය කරන ආරක්ෂක අංශ ශක්තිමත් කිරීමට ඉරානය විසින් යොදවන බවට ඇමෙරිකාව චෝදනා කරනවා.
ඇමෙරිකාව ක්රියාත්මක කර ඇති “Economic Fury” (ආර්ථික කෝපය) නමැති විශේෂ මෙහෙයුම යටතේ මේ වන විටත් ඉරානයේ බිලියන ගණනක තෙල් ආදායම් අවහිර කිරීමට සමත්ව තිබෙනවා.
එමෙන්ම ඉරාන රජයට සම්බන්ධ ඩොලර් මිලියන 500කට ආසන්න ක්රිප්ටෝ මුදල් (Cryptocurrency) වත්කම් ප්රමාණයක් අත්හිටුවීමට සහ ඔවුන්ගේ රහසිගත බැංකු පද්ධති බිඳ දැමීමට ද බටහිර බලධාරීන් පියවර ගෙන ඇති බව විදෙස් මාධ්ය වර්තාවල සඳහන්.
මීට අමතරව, ඉරානයේ මෙම නීති විරෝධී වෙළඳාමට සහාය දක්වන ඕනෑම විදේශීය සමාගමකට, ගුවන් සේවාවකට හෝ චීනයේ ස්වාධීන තෙල් පිරිපහදු සමාගම් සමඟ ගනුදෙනු කරන විදේශීය මූල්ය ආයතනවලට එරෙහිව ද දැඩි ද්විතීයික සම්බාධක පනවන බවට ඇමෙරිකාව අනතුරු අඟවා තිබෙනවා.
