මේ දිනවල ආන්දෝලනයට ලක්ව ඇති අනුරාධපුර බාලවයස්කාර දැරියක් අපයෝජනයට ලක්කර ඇති බව කියන සිදුවීම සම්බන්ධයෙන් ජාතික ළමා ආරක්ෂක අධිකාරිය නිවේදනයක් නිකුත් කර තිබෙනවා.
ඒ අනුව ජාතික ළමා ආරක්ෂක අධිකාරිය පවසන්නේ, මෙම සිදුවීම සම්බන්ධයෙන් නීතිය නිසි පරිදි ක්රියාත්මක වන්නේදැයි ජාතික ළමා ආරක්ෂක අධිකාරිය මෙම සිදුවීම වාර්තා වූ දිනයේ සිට නියාමන කටයුතු සිදු කරමින් සිටින බවයි.
ඉදිරියටද මෙම බාල වයස්කාර දැරියගේ අයිතිවාසිකම් ආරක්ෂා වන පරිදි සහ ඇයට යුක්තිය ඉටුවන පරිදි මෙම විමර්ශන කටයුතු සිදුවනවා දැයි නියාමනය කිරීම සහ අවශ්ය අවස්ථාවල දී ළමයාගේ උපරිම යහපත වෙනුවෙන් සුදුසු පියවර ගැනිමට සුදානම් බවත් එම අධිකාරිය දැනුම් දෙනවා.
මෙම දැරියගේ අයිතිවාසිකම් හා නීතිය නිසි පරිදි ක්රියාත්මක කිරීම සම්බන්ධයෙන් කිසිදු බලපෑමක් ජාතික ළමා ආරක්ෂක අධිකාරිය වෙත එල්ල වී නොමැති බවත්, මේ සම්බන්ධ කටයුතු නිසි පරිදි නියාමනය කිරීමට ජාතික ළමා ආරක්ෂක අධිකාරිය ඉදිරි පියවර ගන්නා බවත් අදාළ නිවේදනය මඟින් සඳහන් කරනවා.
මේ සම්බන්ධයෙන් පුරවැසියන් කිසිදු අනියත බියක් හෝ මහජන කැළඹීමක් ඇති කරගැනීමට හේතුවක් නොමැති බවත්, යම් හෙයකින් අනවශ්ය ලෙස මහජන කැළඹීමක් ඇති වුවහොත් එමගින් යුක්තිය පසිඳලීමේ ක්රියාවලියට බාධාවක් වියහැකි බවත් එම අධිකාරිය වැඩිදුරටත් සඳහන් කර සිටිනවා.
එමෙන්ම මේ වන විට වින්දිත දැරිය විශේෂ රැකවරණ මධ්යස්ථානයක ඉතාම සුරක්ෂිතව රඳවා ඇයගේ ආරක්ෂාව තහවුරු කර ඇති බව ජාතික ළමා ආරක්ෂක අධිකාරිය දැනුම් දෙනවා.
wpDiscuz
