වාරිමාර්ග දෙපාර්තමේන්තුව විසින් පාලනය කරනු ලබන ප්රධාන ජලාශ 16ක් සහ මධ්ය පරිමාණ ජලාශ 17ක් මේ වනවිට වාන් දමමින් පවතින බව එම දෙපාර්තමේන්තුව පවසනවා,
වාරිමාර්ග අධ්යක්ෂක ජල කළමණාකරණ ඉංජිනේරු එච්.එම්.පී.එස්.ඩී හේරත් සඳහන් කළේ, වාන් දමන ප්රධාන ජලාශ අතර අනුරාධපුර දිස්ත්රික්කයේ රාජාංගන ජලාශය, බදුල්ල දිස්ත්රික්කයේ අඹෙවෙල ජලාශය, හම්බන්තොට දිස්ත්රික්කයේ මවුආර, ලුණුගම්වෙහෙර, තිස්ස වැව, වීරවිල යෝධ වැව සහ වෙහෙරගල ජලාශ ඇතුළත් බවයි.
එසේම කුරුණෑගල දිස්ත්රික්කයේ අඹකොළ වැව, උස්ගල සියඹලන්ගමුව, මාගල්ල සහ දැදුරුඔය ජලාශද, මහනුවර දිස්ත්රික්කයේ නාලන්ද සහ වෑමැඩිල්ල ජලාශද, මොණරාගල දිස්ත්රික්කයේ අලිකොටආර ජලාශය සහ මන්නාරම දිස්ත්රික්කයේ යෝධ වැවද වාන් දමමින් පවතින බවයි ඔහු සඳහන් කළේ.
විශේෂයෙන් රාජාංගන ජලාශයේ වාන් දොරටු 12ක් විවෘත කර තත්පරයට ඝන අඩි 14,000කට අධික ජල ප්රමාණයක් කලා ඔයට නිකුත් කෙරෙමින් පවතින බව සඳහන්.
ලුණුගම්වෙහෙර ජලාශයේ වාන් දොරටු 06ක් විවෘත කර තත්පරයට ඝන අඩි 4,100කට අධික ජල ප්රමාණයක් කිරිඳි ඔයට නිකුත් කෙරෙමින් පවතිනවා.
වෙහෙරගල ජලාශයේ වාන් දොරටු 06ක් විවෘත කර තත්පරයට ඝන අඩි 2,400කට අධික ජල ප්රමාණයක් මැණික් ගඟ වෙත මුදාහැරෙමින් පවතින අතර, අලිකොටආර ජලාශයේ වාන් දොරටු 03ක් අඩි 02 බැගින් විවෘත කර තත්පරයට ඝන අඩි 682ක ජල ප්රමාණයක් කිරිඳි ඔයාට මුදා හරිනවා.
එමෙන්ම දැදුරුඔය ජලාශයේ වාන් දොරටු 04 ක් අඩි 01 බැගින් විවෘත කර ඇති අතර ඉන් තත්පරයට ඝන අඩි 2800 බැගින් දැදුරුඔයට නිකුත් කෙරෙන බවයි ඔහු සදහන් කළේ.
මේ හේතුවෙන් පහත්බිම් ප්රදේශවල ජනතාව සහ ගංඟා ආශ්රිතව ජීවත්වන පිරිස් විමසිල්ලෙන් කටයුතු කරන ලෙස වාරිමාර්ග දෙපාර්තමේන්තුව විශේෂයෙන් දැනුම් දැනුම් දෙන්නේ.
