නාවලපිටිය නගරයේ දුම්රිය දෙපාර්තමේන්තුව සතු ඉඩමක බදු පදනම මත පවත්වා ගෙන ගිය මහින්දානන්ද අලුත්ගමගේ පදනම නැවත දුම්රිය දෙපාර්තමේන්තුවට භාර දී තිබෙනවා.
පසුගිය වසරේ දෙසැම්බර් මාසයේ දිස්ත්‍රික් සම්බන්ධීකරණ කමිටුවේ දී ප්‍රවාහන නියෝජ්‍ය අමාත්‍යය ප්‍රසන්න ගුණසේන සහ පාර්ලිමේන්තු මන්ත්‍ර තුෂාරි ජයසිංහ විසින් දුම්රිය දෙපාර්තමේන්තුවට අයත් ඉඩමක පවතවාගෙන යනු ලබන මහින්දානන්ද අලුත්ගමගේ පදනම සහ ඒ ආශ්‍රිත භූමිය නැවත දුම්රිය දෙපාර්තමේන්තුවට මසක් වැනි කාලයක් තුළ පවරා ගැනීමට අවශ්‍ය කටයුතු සිදු කරන ලෙස දැනුම් දුන්නා.
ඒ, අනුව අද (02) පෙරවරුවේ දුම්රිය දෙපාර්තමේන්තුවේ නිලධාරීන්ට එම පදනම් ගොඩනැගිලි සහ භූමිය නැවත පවරාදීම එම පදනමේ ලේකම් චාමික ධර්මතිලක විසින් සිදුකරනු ලැබුවා.
වසර 25 ක පමණ කාලයක සිට නීත්‍යානුකූල ලෙස බදු මුදල් දුම්රිය දෙපාර්තමේන්තුවට ගෙවමින් තමන් විසින් පරිහරණය කළ මෙම දේපළට කිරිබත්ගොඩ ඤාණානන්ද ස්වාමීන් වහන්සේ විසින් මෙහෙයවනු ලබන ‘සදහම් සුවඳ’ සීල භාවනා වැඩසටහනට නාවලපිටිය තරුණ බෞද්ධ සංගමයට පුණ්‍ය කටයුත්තක් සඳහා ලබාදීම වෙනුවෙන් අනවසර භාවිතයක් ලෙස දක්වමින් ගිවිසුම් උල්ලංඝනය කළ බවට දුම්රිය සාමාන්‍යධිකාරී විසින් ඉවත්වන ලෙසට දන්නවා තිබූ නියෝගයට ගරු කරමින් අද දින දුම්රිය දෙපාර්තමේන්තුවට මෙම දේපළ භාර දෙන බවයි එහි ලේකම්වරයා පැවසුවේ.
එමෙන්ම පසුගිය වසර 25 තුළ මහින්දානන්ද අලුත්ගමගේ පදනම මගින් මධ්‍යම පළාත තුළ සමාජ සේවා කටයුතු විශාල ප්‍රමාණයක් සඳහා මෙම ස්ථානයේ භාවිතා කළ බවත් ඒ කිසිදු අවස්ථාවක එමගින් මුදල් ඉපයීමක් සිදු නොකර බවත් එහෙත් මෙම අවස්ථාවේ රජය සමඟ ගැටුමකට නොගොස් මෙය හිමි දුම්රිය දෙපාර්තමේන්තුවට බදු ගිවිසුම 2028 තෙක් තිබියදීම් නැවත භාර දීමට තමන් කටයුතු කරන බව ඔහු පැවසුවේ.
මෙම අවස්ථාවට සහභාගී වූ ජාතික ජන බලවේගයේ පාර්ලිමේන්තු මන්ත්‍රී තුෂාරි ජයසිංහ ප්‍රකාශ කළේ, දීර්ඝ කාලයක සිට හිටපු අමාත්‍ය මහින්දානන්ද අලුත්ගමගේ විසින් අවභාවිත කළ මෙම දේපළ, දිස්ත්‍රික් සම්බන්ධීකරණ කමිටුවේ දී නියෝජ්‍ය අමාත්‍ය ප්‍රසන්න ගුනසේනගේ මැදිහත් වීමෙන් නැවත දුම්රිය දෙපාර්තමේන්තුවටම ලබාගැනීමට කටයුතු කළ බවයි.
ඉදිරියේදී මෙම වටිනා වාණිජ ඉඩම ජනතාවට ප්‍රයෝජනයක් වන පොළ භූමියක් හා වෙනත් ආයතන සඳහා ලබාදීමට බලාපොරොත්තු වන බවත් ඇය ප්‍රකාශ කර සිටියා.
