කාන්තාවක් පාළු ළිඳකට දමා ඝාතනය කර තවත් කාන්තාවක් ඝාතනය කිරීමට තැත් කිරීමේ අපරාධයට අදාළව තවත් සැකකරුවෙකු අත්අඩංගුවට ගත් බව පොලිසිය පවසනවා.
පසුගිය 20 වන දින මඩකලපුව, කොක්කඩිචෝල පොලිස් ස්ථානයට වාර්තා වූ පාලු ළිඳකට දමා තිබිය දී කාන්තා මළ සිරුරක් හමුවීම හා එහි සිටි තවත් කාන්තාවකගේ දිවි බේරාගැනීමේ සිද්ධියට අදාළව වැඩිදුර විමර්ශන නැගෙනහිර පළාත් අපරාධ කොට්ඨාසය විසින් සිදුකරනු ලබනවා.
ඒ, අනුව දැනට සිදුකරන ලද විමර්ශනයේ දී අනාවරණය වූ තොරතුරු මත පෙරේදා (29) දින මෙම ඝාතනයට ආධාර අනුබල දුන් තවත් සැකකරුවෙකු වත්තල පොලිස් වසමේ දී අත්අඩංගුවට ගෙන තිබෙනවා.
නැගෙනහිර පළාත් අපරාධ කොට්ඨාසයේ නිලධාරීන් විසින් අත්අඩංගුවට ගැනුණු අදාළ සැකකරු කොක්කොඩිචෝල පොලිස් ස්ථානය වෙත ඉදිරිපත් කර ඇති බවයි වාර්තා වන්නේ.
මෙලෙස අත්අඩංගුවට ගැනුණු සැකකරු අවුරුදු 49ක වත්තල ප්රදේශයේ ඖෂධහල් හිමිකරුවෙක්.
අත්අඩංගුවට ගන්නා ලද සැකකරු ඊයේ (30) දින මඩකලපුව ගරු මහේස්ත්රාත් අධිකරණයට ඉදිරිපත් කර දින 03ක රැඳවුම් නියෝග මත රඳවා තබාගෙන ප්රශ්න කරනවා.
