රුපියල් දස කෝටි හතලිස් හත් ලක්ෂ හැට දහසක් වටිනා ” කුෂ්” මත්ද්රව්ය තොගයක් රැගත් ශ්රී ලාංකික ගුවන් මගීන් දෙදෙනෙක්, ඒවා කටුනායක ගුවන් තොටුපොළ කිසිවක් ප්රකාශ කිරීමට නොමැති ” හරිත මාවත ” ( Green Channel ) ඔස්සේ පිට කර ගෙන යාමට තැත් කරමින් සිටියදී , අද (26) අලුයම, ගුවන් තොටුපොළ පැමිණීමේ පර්යන්තයේ දී රේගු මත්ද්රව්ය පාලන අංශයේ නිලධාරීන් පිරිසක් විසින් අත්අඩංගුවට ගෙන තිබෙනවා.
මොවුන් දෙදෙනා බගවන්තලාව ප්රදේශයේ පදිංචි පිරිමි පුද්ගලයන් වන අතර 25 හැවිරිදි එක් අයෙකු දොර , ජනෙල් රෙදි අලෙවි සැළක සේවකයෙක් බවත් අනෙක් ගුවන් මගියා 26 හැවිරිදි වියේ පසුවන රියැදුරුවරයෙක් බවයි වාර්තා වන්නේ.
ඔවුන් දෙදෙනා මෙම මත්ද්රව්ය තොගය තායිලන්තයේ බැංකොක් නුවරින් මිළදී ගෙන , පසුව ඉන්දියාවේ නවදිල්ලි නුවර වෙත පැමිණ , එතැන් සිට ඉන්දීය ගුවන් සේවයේ ඒ.අයි.- 3203 දරන ගුවන් යානයෙන් අද දින අලුයම 05.20 ට කටුනායක ගුවන් තොටුපොළ වෙත පැමිණ තිබුණා.
එහිදී ඔවුන් රැගෙන පැමිණි ගමන් මලු 04 ක් තුළ, ව්යාජ පතුල් සකස් කර , ඒවා තුළ , මෙම ” කුෂ්” මත්ද්රව්ය කිලෝ ග්රෑම් 10 යි ග්රෑම් 476 ක් , පැකැට් 12 ක් ලෙස සකස් කර, සගවා ගෙන පැමිණ තිබෙනවා.
මේ පිළිබද වැඩිදුර විමර්ශන කටයුතු සදහා මොවුන් දෙදෙනා සහ ඔවුන් රැගෙන ආ මත්ද්රව්ය තොගය කටුනායක ගුවන් තොටුපොළ පොලිස් මත්ද්රව්ය කාර්යාංශයේ නිලධාරීන් වෙත භාර දීමට පියවර ගෙන තිබෙනවා.
