ත්රිපෝෂ සමාගමේ ත්රිපෝෂ නිෂ්පාදනය මේ වන විට යළි ආරම්භ කර ඇති බව ත්රිපෝෂ සමාගමේ සභාපති අමල් අත්තනායක පවසනවා.
සභාපතිවරයා පැවසුවේ ත්රිපෝෂ නිෂ්පාදනයට අවශ්ය ප්රධානම අමුදව්ය වන ප්රමිතිගත බඩඉරිඟු නොමැතිවීම හේතුවෙන් ත්රිපෝෂ නිෂ්පාදනය මාස ගණනාවක් අඩාළ වී පැවති බවයි.
ඒ, හේතුවෙන් ත්රිපෝෂ සමාගමේ නිෂ්පාදන අඛණ්ඩව සිදුකිරීමට නොහැකි වූ අතර ඉලක්කගත ප්රතිලාභි කණ්ඩායම් වෙත ත්රිපෝෂ ලබාදීම අක්රමවත්ව පැවති බවයි ඔහු පවසන්නේ.
කෙසේ වෙතත් වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්ය වසන්ත සමරසිංහගේ මැදිහත්වීම මත අමාත්ය මණ්ඩල අනුමැතියෙන් ප්රමිතිගත බඩඉරිඟු ආනයනය කිරීම සඳහාපසුගියදා රාජ්ය වාණිජ විවිධ නීතිගත සංස්ථාව සමඟ ත්රිපෝෂ සමාගම එකඟතා ගිවිසුමකට එළඹ තිබුණා.
ඉන් අනතුරුව ත්රිපෝෂ නිෂ්පාදනයට අවශ්ය ප්රමිතිගත බඩඉරිඟු සැපයුම යථාවත් වූ අතර, ඒ අනුව ත්රිපෝෂ නිෂ්පාදනය මේ වන විට යළි ආරම්භ කර තිබෙනවා.
පැය 24 පුරාම ත්රිපෝෂ නිෂ්පාදන කටයුතු සිදු කෙරෙන බවයි සභාපති අමල් අත්තනායක වැඩිදුරටත් පැවසුවේ.
මෙම මාසය අවසන් වන විට ත්රිපෝෂ නොලැබුණු සැමට සෞඛ්ය වෛද්ය නිලධාරී කාර්යාල හරහා ත්රිපෝෂ ලබාගැනීමට හැකි වන පරිදි බෙදාහැරීම් දිවයින පුරා සිදුකරන බවත්, එමෙන්ම වසරේ ඉදිරි මාස කිහිපයටත් අවශ්ය සැපයුම අඛණ්ඩව සිදුකළ හැකි බවත් සභාපතිවරයා සදහන් කළා.
