පසුගිය වසරේ නොවැම්බර් මස අග භාගයේ පැවති අයහපත් කාලගුණික තත්ත්වය හේතුවෙන් හානියට පත් ක්ෂේත්ර භෝග, එළවළු සහ පළතුරු වගාවන් කඩිනමින් නැවත වගා කිරීම සඳහා ගොවීන් වෙත සහන සැලසීමටත්, එම ආපදා තත්ත්වය හේතුවෙන් හානියට පත් වූ ගම්මිරිස්, කෝපි සහ කරඳමුංගු වැනි සුළු අපනයන භෝග නැවත වගාවන් සඳහා සහන සැලසීමටත් අමාත්ය මණ්ඩලයේ අනුමැතිය දැනටමත් ලබා දී ඇති අතර, අදාළ සහනයන් ප්රතිලාභී ගොවින් වෙත ලබා දීමට මේ වන විට පියවර ගනිමින් සිටින බව කැබිනට් මාධ්ය ප්රකාශක අමාත්ය නලින්ද ජයතිස්ස පවසනවා.
ඔහු මේ බව සඳහන් කළේ අද (10) පැවති කැබිනට් තීරණ දැනුම්දීමේ මාධ්ය හමුවේදී යි.
එසේම, හානියට පත්ව ඇති තේ, පොල් සහ රබර් නැවත වගා කිරීම සඳහා ද සහන සලසා දීමේ අවශ්යකාව පිළිබඳව වැවිලි සහ ප්රජා යටිතල පහසුකම් අමාත්යාංශය විසින් මහා භාණ්ඩාගාරය වෙත නිර්දේශ ඉදිරිපත් කර තිබෙනවා.
එම නිර්දේශ මත පදනම්ව, ආපදාවේ බලපෑම අනුව පහත සඳහන් පරිදි සහන සලසා දීම පිණිස මුදල්, ක්රම සම්පාදන සහ ආර්ථිත සංවර්ධන අමාත්ය වශයෙන් ජනාධිපතිවරයා විසින් ඉදිරිපත් කළ යෝජනාව අමාත්ය මණ්ඩලය විසින් අනුමත කළ බව කැබිනට් මාධ්ය ප්රකාශක නලින්ද ජයතිස්ස පවසා සිටියා.
ඒ අනුව, තේ වගාව සඳහා උපරිම් වශයෙන් හෙක්ටයාරයකට රුපියල් 500,000/- දක්වා, රබර් වගාව සඳහා උපරිම වශයෙන් හෙක්ටයාරයකට රුපියල් 400,000/- දක්වා, පොල් වගාව සඳහා උපරිම වශයෙන් හෙක්ටයාරයකට රුපියල් 750,000/- දක්වා සහන සැලසීම සඳහා කැබිනට් අනුමැතිය හිමිව තිබෙනවා.
