මේ වනවිට විදෙස් ගතව සිටින සංවිධානාත්මක අපරාධකරුවෙක් වන මනෝජ් සුරංග ලියනගේ නොහොත් බටුවත්තේ චාමර නැමැත්තාගේ බිරිඳට අයත් බව කියන ජා ඇළ, වැලිගම්පිටිය ප්රදේශයේ පිහිටි නිවසකට වෙඩි ප්රහාරයක් එල්ල වී තිබෙනවා.
අද (07) අලුයම් කාලයේ මෙම වෙඩි තැබීම සිදුව ඇති අතර, වෙඩිතැබීමේ දී වෙඩික්කරුවන් විසින් අසල පිහිටි තවත් නිවාස දෙකකට ද වෙඩිතබා පලාගොස් ඇති බවයි තොරතුරු වාර්තා වුණේ.
යතුරුපැදියකින් පැමිණි වෙඩික්කරුවන් දෙදෙනෙකු විසින් ටී 56 වර්ගයේ ගිනිඅවියකින් මෙම වෙඩිතැබීම සිදුකර ඇති බවයි අනාවරණය වී ඇත්තේ.
මනෝජ් සුරංග ලියනගේ හෙවත් බටුවත්තේ චාමරගේ බිරිඳ පදිංචිව සිටි නිවසට මෙම වෙඩිතැබීම සිදුකර ඇති අතර, ඇය මේ වනවිට ඩුබායි රැඳී සිටින බවයි තොරතුරු වාර්තා වුණේ.
ඇයගේ මෙම නිවස දැනට මාස 02ක පමණ සිට වැඩිහිටි නිවාසයක් සඳහා මාසිකව කුලී පදනම මත ලබා දී ඇති බවයි තොරතුරු වාර්තා වන්නේ.
අද (07) අලුයම් කාලයේ මෙම වෙඩිතැබීම සිදුවන අවස්ථාවේ මෙම නිවසේ වැඩිහිටියන් 09 දෙනෙකු සහ සාත්තු සේවිකාවන් සිව්දෙනෙකු සිට ඇති බව ද වාර්තා වනවා.
මෙම නිවසට මීට පෙර අවස්ථා දෙකක දී වෙඩි ප්රහාර එල්ල වී තිබෙනවා.
