ඉරානයට එල්ල කරන ලද එක්සත් ජනපද සහ ඊශ්රායල ගුවන් ප්රහාර සහ ටෙහෙරානයේ ප්රතිප්රහාරවලින් පසුව කලාපීය ආතතීන් උත්සන්න වීමත් සමඟ ඉන්දීය අගමැති නරේන්ද්ර මෝදි මැද පෙරදිග සාමය සහ ස්ථාවරත්වය ඇති කිරීම සඳහා යොමු වන ලෙස සියලු පාර්ශ්වයන්ගෙන් ඉල්ලා සිටිනවා.
“ඉන්දියාව සාමය සහ ස්ථාවරත්වය වෙනුවෙන් පෙනී සිටී” යැයි මෝදි පැවසුවා.
ඔහු පැවසුවේ නවදිල්ලිය “සංවාදය සහ රාජ්ය තාන්ත්රිකභාවය තුළින්” ආරවුල් විසඳීමට සහාය දෙන බවයි.
X හි පළ කරන ලද සටහනකට අනුව, මෝදි ඉරිදා ඊශ්රායල අග්රාමාත්යවරයා සමඟ “වත්මන් කලාපීය තත්ත්වය” සාකච්ඡා කර තිබෙනවා.
දිග හැරෙමින් පවතින වර්ධනයන් පිළිබඳව ඉන්දියාවේ කනස්සල්ල ඔහු දැනුම් දුන් අතර සිවිල් ආරක්ෂාව ප්රමුඛතාවයක් ලෙස පැවතිය යුතු බව අවධාරණය කරමින්, සතුරුකම් ඉක්මනින් නැවැත්වීමේ අවශ්යතාවය නැවත අවධාරණය කළ බව එම සටහනේ දැක්වුණා.
අර්බුදයට ප්රතිචාර වශයෙන්, ඉන්දීය රජය අගමැතිගේ සභාපතිත්වයෙන් යුත් රටේ ඉහළම ආරක්ෂක තීරණ ගැනීමේ ආයතනය වන ආරක්ෂාව පිළිබඳ කැබිනට් කමිටුවේ රැස්වීමක් ද කැඳවනු ලැබුවා.
කලාපයේ සිටින ඉන්දියානු ප්රජාවගේ ආරක්ෂාව පිළිබඳව කමිටුව බරපතල කනස්සල්ල පළ කළ අතර බලපෑමට ලක් වූ පුරවැසියන්ට සහාය වීම සඳහා අවශ්ය පියවර ගන්නා ලෙස අදාළ දෙපාර්තමේන්තු වෙත උපදෙස් දී තිබෙනවා.
එමෙන්ම අගමැති මෝදි සෞදි ඔටුන්න හිමි කුමරු මොහොමඩ් බින් සල්මාන් සහ බහරේනයේ හමාඩ් බින් ඉසා අල් කලීෆා සමග දුරකතනය ඔස්සේ සාකච්ඡා කර තිබෙනවා.
