විදෙස් සංචාරකයින්ගේ පැමිණීම ලක්ෂ තුන ඉක්මවයි

මෙම වසරේ මේ දක්වා ගතවූ කාලය තුළ දිවයිනට පැමිණ ඇති විදෙස් සංචාරකයින් සංඛ්‍යාව ලක්ෂ 03 ඉක්මවා තිබෙනවා.

ශ්‍රී ලංකා සංචාරක සංවර්ධන අධිකාරිය සඳහන් කළේ ජනවාරි පළමුවනදා සිට පෙබරවාරි 04 දක්වා කාලය තුළ විදෙස් සංචාරකයින් 317,381 දෙනෙකු දිවයිනට පැමිණ ඇති බවයි.

මෙලෙස දිවයිනට පැමිණි විදෙස් සංචාරකයින්ගෙන් වැඩිම සංඛ්‍යාවක් ඉන්දියාවෙන් පැමිණ ඇති අතර, එම සංඛ්‍යාව 57,348ක්.

ඊට අමතරව බ්‍රිතාන්‍ය සංචාරකයින් 34,724ක්, රුසියානු ජාතික සංචාරකයින් 30,951 සහ ජර්මානු ජාතික සංචාරකයින් 20,273ක් මෙම කාලය තුළ දිවයිනට පැමිණ තිබෙනවා.

එම රටවලට අමතරව චීනය, ඕස්ට්‍රේලියාව, ප්‍රංශය, නෙදර්ලන්තය වැනි රටවල්වලින් ද විදෙස් සංචාරකයින් වැඩි පිරිසක් මෙරටට පැමිණ ඇති බවයි සංචාරක සංවර්ධන අධිකාරිය සඳහන් කළේ.

මේ අතර මෙම මාසයේ මුල් දින හතරක කාලය තුළ දී විදෙස් සංචාරකයින් 40,054 දෙනෙකු දිවයිනට පැමිණ තිබෙනවා.