ශ්රී ලංකා ඇඟලුම් අපනයනකරුවන්ට ජනවාරි පළමු වන දා සිට බලපැවැත්වෙන පරිදි එක්සත් රාජධානියට සිදුකෙරෙන ඇඟලුම් අපනයනයන්හි තීරු බදු රහිත ප්රවේශය හිමිව තිබෙනවා.
සංවර්ධනය වෙමින් පවතින රටවල වෙළෙඳ යෝජනා ක්රමය සඳහා හඳුන්වා දෙන ලද ප්රතිසංස්කරණ ජනවාරි පළමු වන දා සිට ක්රියාත්මක බව බ්රිතාන්ය මහ කොමසාරිස් කාර්යාලය දැනුම් දී ඇති බවයි වාර්තා වන්නේ.
එක්සත් රාජධානිය ශ්රී ලංකාවේ දෙවන විශාලතම ඇඟලුම් අපනයන වෙළෙඳපොළ වන අතර එහි වටිනාකම ආසන්න වශයෙන් ඇමෙරිකානු ඩොලර් මිලියන 675ක් පමණ වනවා.
නව විධිවිධාන බලාත්මක වීමත් සමග ශ්රී ලංකාවේ සිට එක්සත් රාජධානියට සිදුකෙරෙන ඇඟලුම් අපනයනයන්හි සැලකිය යුතු ඉහළ යාමක් අපේක්ෂා කරන බවයි වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්යාංශය නිවේදනයක් නිකුත් කරමින් පවසන්නේ.
ශ්රී ලාංකික නිෂ්පාදකයින්ට වරණීය තීරු බදු ප්රතිලාභ පවත්වා ගනිමින් කලාපීය හවුල්කරුවන්ගෙන් භාණ්ඩ ලබා ගැනීමට ද අවස්ථාව සැලසෙන අතර මෙම නව වෙළෙඳ රීති යටතේ ශ්රී ලංකාවේ ඇඟලුම් නිෂ්පාදකයින්ට පෙර නොවූ විරූ වරප්රසාද රැසක් හිමි වන බවත් එම නිවේදනයේ සඳහන්.
ඇඟලුම් නිෂ්පාදනය සඳහා අවශ්ය අමුද්රව්යවලින් 100%ක්ම ලෝකයේ ඕනෑම රටකින් සපයා ගැනීමට නිෂ්පාදකයින්ට අවසර ඇත. එසේ තිබියදීත්, එම නිමි ඇඟලුම් බ්රිතාන්යයට අපනයනය කිරීමේදී සම්පූර්ණ බදු සහනය හිමි වනවා.
එමෙන්ම මින් පෙර පැවති රීති අනුව ඇඟලුම් නිෂ්පාදනයේදී ප්රධාන ක්රියාවලීන් දෙකක් ශ්රී ලංකාව තුළ සිදු විය යුතු වුවද, නව සංශෝධන මගින් එම කොන්දේසිය ඉවත් කර නිෂ්පාදන ක්රියාවලීන් සරල කර තිබෙනවා.
ඇඟලුම් නොවන අනෙකුත් අපනයන සඳහා රටවල් 18කින් සමන්විත ආසියානු කලාපීය කණ්ඩායමක් හඳුන්වා දී තිබෙනවා.
මේ හරහා එම රටවලින් අමුද්රව්ය ලබාගෙන නිෂ්පාදනය කරන භාණ්ඩ සඳහා ද බ්රිතාන්යයේ වෙළෙඳ සහන අඛණ්ඩව ලබා ගත හැකියාවද පවතිනවා.
