ජාතික ඖෂධ නියාමන අධිකාරිය විසින් ඉන්දියාවේ නිෂ්පාදනය කරනු ලබන එන්නතක් වන ඔන්ඩන්සෙට්රොන් (Ondansetron) යන ඖෂධය භාවිතා කිරීම වළක්වාලමින් පසුගිය දා (12) ලිපියක් නිකුත් කර තිබුණා.
මෙම ඖෂධය Ondanman 8 යන වෙළඳ නාමයෙන් ඉන්දියානු සමාගමක් විසින් නිෂ්පාදනය කරන අතර ප්රධානතම වමන නාශක ඖෂධයක් ලෙස මෙය භාවිත වන බවයි වාර්තා වන්නේ.
ජාතික ඖෂධ නියාමන අධිකාරිය විසින් මෙලෙස මෙම ඖෂධය තහනම් කිරීම සම්බන්ධයෙන් දැනුවත් කිරීමට අද (16) රජයේ වෛද්ය නිලධාරීන්ගේ සංගමය විසින් මාධ්ය හමුවක් කැඳවා තිබුණා.
එහිදී එම සංගමයේ මාධ්ය ප්රකාශක වෛද්ය චමිල් විජේසිංහ විසින් පවසා සිටියේ එම ඖෂධය භාවිතා කළ රෝගීන් කිහිපදෙනෙක්ට ආසාත්මිකතා වාර්තා වී ඇති බවයි.
ඒ අනුව මෙලෙස ආසාත්මිකතා වාර්තා වීම මත මහනුවර ජාතික රෝහල විසින් සිදු කරනු ලැබූ මූලික විමර්ශනයක වාර්තාවක් මත පදනම්ව ඖෂධයේ ප්රමිතිය පිළිබද ඈති වූ ගැටලුකාරී තත්ත්වයක් මත මෙලෙස මෙම ඖෂධය තාවකාලිව භාවිතය අත්හිටවීමට පියවර ගෙන ඇති බව ඔහු සඳහන් කළා.
මෙම ඖෂධය නිෂ්පාදනය කරන ක්රියාවලිය අතරතුරදීම මෙලෙස ඖෂධයේ ප්රමිතියට හානියක් සිදු වූවාද නැතිනම් ආනයනය කළ පසු ප්රවාහනය ඇතුළු දේශීය ක්රියාවලිය තුළ යම් කිසි හානියක් සිදු වූවාද යන්න සම්බන්ධයෙන් හඳුනාගැනීම සිදු කළ යුතු බව ඔහු සඳහන් කළා.
එමෙන්ම එලෙස ඖෂධයක් මෙරටට් රැගෙන ඒමේදී ඖෂධ නියාමන අධිකාරියේ විද්යගරයාක් තුළ පරීක්ෂණ කටයුතු සිදු කොට රට තුළට රැගෙන ඒමට අවසර හිමිවන නිසා එම පරීක්ෂණ ක්රියාවලිය තුළ මෙම ගැටළුව මතු නොවුනේ මන්ද යන්න සම්බන්ධයෙන්ද ප්රශ්න සහගත බව වෛද්ය චමිල් විජේසිංහ පවසනවා.
කෙසේ වෙතත් මෙවැනි සිදුවීම් සෑම වසකරම සිදුවන බවත් මේ සම්බන්ධයෙන් අනිසි බියක් ඇතිකර නොගන්නා ලෙස ඔහු ඉල්ලා සිටිනවා.
