ඊයේ (22) උදෑසන පහළ කඩුගන්නාව – ගනේතැන්න ප්‍රදේශයේ නාය යෑමට ලක් වූ ස්ථානයේ සිට මහනුවර දෙසට කිලෝමීටරයක් පමණ දුරින් කොළඹ – නුවර මාර්ගයේ ඉරි තැලීමකට ලක්ව ගිලා බැසීමක් සිදුව තිබෙනවා.
මෙම මාර්ගයට යටින් ගිලාබැස කුහරයක් සෑදී ඇති බවයි පරීක්ෂණ සිදුකරන නිලධාරීන් පවසන්නේ.
මේ අතර නාය යෑමට ලක් වූ ස්ථානයෙන් තවමත් කුඩා දියපහරක් ගලා යන අතර, එම පස් කන්ද තවදුරටත් ප්‍රසාරණය විය හැකි බවට ජාතික ගොඩනැඟිලි පර්යේෂණ සංවිධානය සැකපළ කරනවා.
මේ අතර නාය යෑමට ලක් වූ ස්ථානයේ අවට පිරිස් ඔවුන්ගේ වාසස්ථානවලින් ඉවත් කිරීමට කටයුතු කර තිබෙනවා.
එමෙන්ම මහනුවර – කොළඹ ප්‍රධාන මාර්ගය පහළ කඩුගන්නාව – ගනේතැන්න ප්‍රදේශයෙන් වසාදමා ඇති අතර, එම මාර්ගය භාවිත කරන රියදුරන්ට විකල්ප මාර්ග හඳුන්වා දී තිබෙනවා.
මේ අතර මහනුවර අතිරේක දිස්ත්‍රික් ලේකම්වරයා සඳහන් කළේ මාර්ගය යළි විවෘත කිරීමට අවස්ථාවක් ලැබුනහොත් බර වාහනවලට එම මාර්ගය භාවිත කිරීමට හැකියාවක් පවතී ද යන්න පිළිබඳව ගැටළුවක් පවතින බවයි.
