වව්නියාව සරසවියේ පළමු වසරේ සිසුවෙක් නේවාසිකාගාර කාමරය තුළ මිය ගිහින්

වව්නියාව විශ්ව විද්‍යාලයේ සිසුවෙක් සිය නේවාසිකාගාර කාමරයේ මියගොස් සිටිය දී අද (01) උදෑසන සොයාගෙන තිබෙනවා.

මෙලෙස මියගොස් ඇත්තේ එම විශ්ව විද්‍යාලයේ තාක්ෂණික පීඨයේ සිසුවෙක් පළමුවන වසරේ ඉගෙනු ලැබූ සිසුවෙක් බවයි වාර්තා වුණේ.

23 හැවිරිදි මෙම සිසුවා අනුරාධපුර ප්‍රදේශයේ පදිංචිකරුවෙක් බවයි පොලිසිය සඳහන් කළේ.

නේවාසිකාගාර කාමරයේ මියගොස් සිටිය දී සිසුවා සොයාගැනීමෙන් අනතුරුව සිරුර වව්නියාව රෝහල වෙත රැගෙන ගොස් ඇති බවයි පොලිසිය වැඩිදුරටත් පැවසුවේ.

මෘත දේහය සම්බන්ධයෙන් වන පශ්චාත් මරණ පරීක්ෂණය සිදුකිරීමට නියමිත අතර, පුවරසන්කුලම් පොලිසිය සිද්ධිය පිළිබඳව වැඩිදුර විමර්ශන සිදුකරනු ලබනවා.

මේ අතර මෙම සිසුවා මීට දින කිහිපයකට පෙර හෘදය සම්බන්ධ රෝගයකට ප්‍රතිකාර ලබාගෙන ඇති බවට තොරතුරු අනාවරණය වී ඇති අතර, ඊයේ (31) දින රාත්‍රියේ තවත් මිතුරන් කිහිපදෙනෙකු ද සමඟ මත්පැන් සාදයක් පවත්වා ඇති බවට ද තොරතුරු වාර්තා වනවා.