ශ්‍රී ලංකා පොලිසියේ පරිපාලන කටයුතු භාර තනතුරේ වෙනසක් සිදුවීමට නියමිත බව පොලිස් අභ්‍යන්තර ආරංචි මාර්ග සඳහන් කරනවා.
ජ්‍යෙෂ්ඨ නියෝජ්‍ය පොලිස්පති ලලිත් පතිනායක පරිපාලන කටයුතු භාර තනතුරේ කටයුතු කරන අතර, ඔහු එම තනතුරින් ඉවත් කිරීමට යන බවයි වාර්තා වන්නේ.
ඒ අනුව ජ්‍යෙෂ්ඨ නියෝජ්‍ය පොලිස්පති ලලිත් පතිනායකගේ රාජකාරී වගකීම එනම් පරිපාලන කටයුතු භාර තනතුර වෙනුවෙන් ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න පත් කිරීමේ සූදානමක් පවතින බවටයි තොරතුරු වාර්තා වුණේ.
ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න දරණ බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති ධුරය සඳහා ජ්‍යෙෂ්ඨ නියෝජ්‍ය පොලිස්පති සජීව මැදවත්ත පත්කිරීමට නියමිත බව සඳහනන්.
පසුගිය කාලය තුළ ජ්‍යෙෂ්ඨ නියෝජ්‍ය පොලිස්පති ලලිත් පතිනායක සම්බන්ධයෙන් යම් අර්බුදකාරී තත්ත්වයන් වාර්තා වුණා.
පොලිස් පරිපාලන ධුරය සැලකෙන්නේ පොලිස්පතිවරයාට පමණක් දෙවැනි වන තනතුර ලෙසයි.
