සරල කරන ලද එකතු කළ අගය මත බදු (SVAT System) ක්රමවේදය පිළිබඳව රජයේ මුදල් පිළිබඳ කාරක සභාවේදී දීර්ඝව සාකච්ජා කිරීමක් සිදු වී තිබෙනවා.
මෙහිදී දේශිය ආදායම් දෙපාර්තමේන්තුව නියෝජනය කරමින් පැමිණි නිලධාරීන් විසින් SVAT ක්රමවේදය පිළිබඳව ඉදිරිපත් කිරීමක් සහිතව (Presentation) කාරක සභාව දැනුවත් කිරීම සිදු කළ අතර එහිදී පැන නගින ගැටලු නිරවුල්කර ගැනීමද මෙම සාකච්ඡාවේදී සිදු වී ඇති බව වාර්තා වනවා.
මේ පිළිබද සාකච්ඡා කිරීම සිදු වූයේ රජයේ මුදල් පිළිබඳ කාරක සභාව පාර්ලිමේන්තු මන්ත්රී ආචාර්ය හර්ෂ ද සිල්වාගේ සභාපතිත්වයෙන් පසුගියදා (07) පාර්ලිමේන්තුවේදී රැස්වූ අවස්ථාවේදීයි.
මෙහිදී පැමිණි නිලධාරීන් පෙන්වා දුන්නේ VAT ක්රමවේදය යටතේ නැවත ගැනීමේ හැකියාව සහිත ගෙවීම් (Refund payments delays) නැවත ගැනීමේදී 100%ක විගණනයක් කරන බවත් මේ නිසා ප්රමාදයක් පවතින බවත්ය.
නමුත් මෙම SVAT ක්රමවේදය මගින් එම ප්රමාදය අවම කරමින් දින 45ක් ඇතුළත කඩිනමින් එම නැවත ගෙවීම් සිදු කළ හැකි වන බවද එම නිලධාරීහු වැඩි දුරටත් පෙන්වා දුන්නා.
එසේම මෙම ක්රමවේදය මගින් පැවති සංකීර්ණතාවය අවම කිරීම සහ ආදායම වැඩි කරගැනීමද අරමුණු කරන බව නිලධාරීන පවසා සිටියා.
මෙහිදී කාරක සභාව පෙන්වා දුන්නේ අපනයන කර්මාන්තකරුවන් වඩාත් සෑහීමකට පත් වීම මෙම ක්රමවේදය හරහා සිදු විය යුතු බවත්. අවධානම් තත්ත්වයක් හමුවේ කටයුතු කිරීම (risk rating ) සම්බන්ධයෙන්ද පෙන්වා දුන් අතර අභියාචනා ඉදිරිපත් කිරීමේ ක්රමවේදයක් සකස් කිරීමේ අවශ්යතාවය මෙහිදී කාරක සභාවේ සභාපතිවරයා පෙන්වා දුන්නා.
තවද දින 45 ඇතුළත ගෙවීමක් කිරීමට අපහසු වුවහොත් ඒ වෙනුවෙන් ගෙවීමේදී යම් පොලී අනුපාතයක් පවත්වාගෙන යාමේ අවශ්යතාවද කාරක සභාව විසින් පැහැදිලිකර තිබෙනවා.
