ගාසා තීරයේ රඳවා සිටින සියලු ප්‍රාණ ඇපකරුවන් ඉදිරි දිනවල නිදහස් කරනු ඇතැයි ඊශ්‍රායල අග්‍රාමාත්‍ය බෙන්ජමින් නෙතන්යාහු පවසයි.
“හමාස් නිරායුධ කරනු ලබන අතර ගාසා තීරය හමුදාකරණයෙන් ඉවත් කරනු ලබනවා. එය පහසු ක්‍රමය හෝ දුෂ්කර ක්‍රමය, නමුත් එය සාක්ෂාත් කර ගනු ඇති.” යනුවෙන් එරට රූපවාහිනීයේ විශේෂ ප්‍රකාශයක් කරමින් නෙතන්යාහු සඳහන් කළා.
ඇමරිකානු ජනාධිපති ඩොනල්ඩ් ට්‍රම්ප් ඉදිරිපත් කළ සාම සැලැස්මේ ඇතැම් කරුණුවලට හමාස් සංවිධානය සිය එකඟතාව පළකිරීමත් සමඟයි නෙතන්යාහු මේ බව පැවසුවේ.
ඒ, අනුව සටන් විරාම සාකච්ඡා ඊජිප්තුවේ දී හෙට (06) ආරම්භ වීමට නියමිත අතර, ගාසා සාම සැලැස්මේ තාක්ෂණික කරුණු සාකච්ඡා කිරීමට ඊශ්‍රායල කණ්ඩායමක් ඊජිප්තුවට පිටත්ව ගොස් තිබෙනවා.
මේ අතර ගිවිසුමේ කොන්දේසිවලට අනුව හමාස් සංවිධානය නිරායුධ වනු ඇතැයි තමා අපේක්ෂා කරන බව ඊශ්‍රායල අග්‍රාමාත්‍ය බෙන්ජමින් නෙතන්යාහු අපේක්ෂා කරනවා.
කෙසේ වෙතත් ප්‍රාණ ඇපකරුවන් නිදහස් කිරීමට එකඟ වූ නමුත් නිරායුධකරණය සම්බන්ධයෙන් හමාස් සංවිධානය කිසිවක් සඳහන් කර නැහැ.
කරුණු 20 ක ගිවිසුම මඟින් සටන් වහාම අවසන් කිරීම සහ හමාස් විසින් රඳවාගෙන සිටින ජීවමාන ඊශ්‍රායල ප්‍රාණ ඇපකරුවන් 20 දෙනෙකු මෙන්ම මියගිය බවට සැලකෙන අයගේ දේහයන් සහ සිය ගණනක් රඳවාගෙන සිටින ගාසා වැසියන් නිදහස් කිරීම යෝජනා කෙරෙනවා.
