මන්ත්‍රි රෝහිතගේ දුව අද මතුගම මහෙස්ත්‍රාත් අධිකරණයට 

පාර්ලිමේන්තු මන්ත්‍රී රෝහිත අබේගුණවර්ධනගේ දියණිය වන රොෂෙල් අබේගුණවර්ධන අද (31) මතුගම මහෙස්ත්‍රාත් අධිකරණයට ඉදිරිපත් කිරීමට නියමිතව ඇත. ඇය ඊයේ (30) වලාන මධ්‍යම දූෂණ මර්දන ප්‍රහාරක ඒකකයට නීතිඥයකු සමග පැමිණ භාරවීමෙන් අනතුරුව අත්අඩංගුවට ගෙන තිබේ.

මෙම අත්අඩංගුවට ගැනීම සිදුව ඇත්තේ නීතිවිරෝධීව රටට ආනයනය කරන ලද මෝටර් රථයක් සම්බන්ධයෙන් මෝටර් රථ ප්‍රවාහන දෙපාර්තමේන්තුවේ දත්ත පද්ධතියට ව්‍යාජ තොරතුරු ඇතුළත් කිරීම පිළිබඳ විමර්ශනය සම්බන්ධයෙනි.

පසුගිය 19 වැනිදා මතුගමදී, ව්‍යාජ ලෙස ලියාපදිංචි කරන ලද එම නීතිවිරෝධී රථය මාර්ගයේ ධාවනය කරමින් සිටියදී, වලාන දූෂණ මර්දන ප්‍රහාරක ඒකකය විසින් අත්පත් කර ගන්නා ලදී. එම අවස්ථාවේදී රථය පැදවූ පාර්ලිමේන්තු මන්ත්‍රී ජගත් විතානගේගේ පුත්‍රයාද අත්අඩංගුවට ගන්නා ලද අතර, ඔහුව අගෝස්තු 01 වැනිදා දක්වා රක්ෂිත බන්ධනාගාරගත කරන ලදී.

පොලිසිය මගහරිමින් සිටි රෝහිත අබේගුණවර්ධනගේ දියණිය රොෂෙල් අබේගුණවර්ධන ඊයේ (30) වලාන මධ්‍යම දූෂණ මර්දන ප්‍රහාරක ඒකකයට නීතිඥයකු සමග පැමිණ භාරවීමෙන් අනතුරුව අත්අඩංගුවට ගන්නා ලදී.