ජ’පුර වෛද්‍යවරියගේ සැත්කම්වලින් අගතියට පත්වූවන්ගේ තොරතුරු සොයයි

අල්ලස් කොමිසම මඟින් අත්අඩංගුවට ගැනුණු ශ්‍රී ජයවර්ධනපුර රෝහලේ විශේෂඥ ස්නායු ශල්‍ය වෛද්‍ය මහේෂි විජේරත්න යටතේ ශල්‍යකර්මවලට ලක්ව අගතියට පත් පුද්ගලයින්ගේ තොරතුරු රැස්කිරීමට අල්ලස් හෝ දූෂණ විමර්ශන කොමිෂන් සභාව තීරණය කර තිබෙනවා.

මෙලෙස අගතියට පත් වූ පුද්ගලයින් 77 දෙනෙකුගෙන් පමණ මේ වනවිට ප්‍රකාශ ලබාගෙන ඇති බවයි අල්ලස් කොමිසම නිවේදනයක් නිකුත් කරමින් සඳහන් කළේ.

ඒ අනුව වෛද්‍යවරියගේ අක්‍රමිකතාව හේතුවෙන් අගතියට පත් තවත් පුද්ගලයින් හෝ මෙම අක්‍රමිකතාව පිළිබඳව තොරතුරු දන්නා පුද්ගලයින්ට අදාළ තොරතුරු ලබාදිය හැකි බවයි එම කොමිෂන් සභාව පැවසුවේ.

මෙම තොරතුරු 1954 යන අල්ලස් හෝ දූෂණ චෝදනා විමර්ශන කොමිෂන් සභාවේ ක්ෂණික ඇමතුම් අංකයට හෝ [email protected] විද්‍යුත් ලිපිනය හරහා ලබාදීමේ හැකියාව පවතිනවා.

ශල්‍ය උපකරණ භාවිතයෙන් සිදුකළ ස්නායු ශල්‍යකර්මවලදී එම උපකරණ බාහිර ආයතනවලින් ලබාගැනීමට සැලැස්වීම තුළින් රෝගීන්ට අලාභ සිදුකිරීම් ඇතුළු චෝදනා කිහිපයක් යටතේ මෙම වෛද්‍යවරිය සමඟ තවත් දෙදෙනෙක් පසුගිය 17 වනදා අත්අඩංගුවට ගනු ලැබුවා.

අත්අඩංගුවට ගැනුණු සැකකාර වෛද්‍යවරයා සහ සැකකරුවන් දෙදෙනා ලබන 24 වනදා දක්වා රක්ෂිත බන්ධනාගාරගත කර කිරීමටයි කොළඹ අතිරේක මහේස්ත්‍රාත්වරයා නියෝග කළේ.