වසර 20ක සිරදඬුවමක් විඳිමින් සිටින හිටපු අමාත්ය මහින්දානන්ද අලුත්ගමගේ එම දඬුවමට එරෙහිව ශ්රේෂ්ඨාධිකරණයට අභියාචනයක් ඉදිරිපත් කර තිබෙනවා.
නීතිඥ සනත් විජේවර්ධන මාර්ගයෙන් ගොනුකර තිබෙන මෙම අභියාචනය ශ්රේෂ්ඨාධිකරණයට ඉදිරිපත් කිරීම සඳහා කොළඹ මහාධිකරණය වෙත භාර දී ඇති බවයි වාර්තා වුණේ.
2015 වසරේ පැවති ජනාධිපතිවරණය සමයේ කැරම්බෝඩ් 14,000 සහ දාම් බෝඩ් 11,000 ක් නීතියට පටහැනි ලෙස මිලදී ගෙන ක්රීඩා සංගම් අතර බෙදාදීම තුළින් රජයට රුපියල් මිලියන 53 කට අධික පාඩුවක් සිදුකළේ යැයි චෝදනා කරමින් ගොනු කර තිබූ නඩුවේ වැරදිකරු කරමින් අධිකරණය ඔහුට වසර 20ක සිරදඬුවමක් නියම කළා.
පෙත්සම්කරු කියා සිටින්නේ අල්ලස් කොමිසම විසින් ගොනුකළ ඉහත චෝදනාවලට වරදකරු කෙරුණු තමන්ට කොළඹ ත්රිපුද්ගල මහාධිකරණ විනිසුරු මඩුල්ලක් විසින් බරපතළ වැඩ සහිත වසර 20ක සිර දඬුවම් සහ දඩ මුදල් නියම කළ බවයි.
ත්රිපුද්ගල මහාධිකරණ විනිසුරු මඩුල්ල ඇතැම් කරුණු වැරදි ලෙස අර්ථකරණය කරමින් මෙම නඩු තීන්දුව ලබාදී ඇති බවත් ඔහු අභියාචනයෙන් සඳහන් කර තිබෙනවා.
එමෙන්ම විත්තිය විසින් ඉදිරිපත් කළ ඇතැම් කාරණා නඩු තීන්දුව ලබාදීමේ දී මහාධිකරණ විනිසුරු මඩුල්ල සැලකිල්ලට ගෙන නොමැති බවත් එම අභියාචනයේ සඳහන්.
ඒ, අනුව තමන්ට එරෙහිව පැනවූ එම දඬුවම නීතියට පටහැනි බව අභියාචනය මඟින් දන්වා ඇති අතර, අදාළ තීන්දුව බල රහිත කිරීමේ නියෝගයක් නිකුත් කොට තමන්ව සියලු චෝදනාවලින් නිදොස් කොට නිදහස් කිරීමේ නියෝගයක් නිකුත් කරන ලෙස හිටපු අමාත්යවරයා ශ්රේෂ්ඨාධිකරණයෙන් ඉල්ලා තිබෙනවා.
