නීතිඥවරයෙකුගේ දූරකථනය ඉල්ලන්න පොලිසියට බලයක් නෑ – ශ්‍රී ලංකා නීතිඥ සංගමය

නීතිඥ දිනේෂ් දොඩම්ගොඩ මහතාගේ ජංගම දූරකථනය කොළඹ අපරාධ කොට්ඨාස‍යෙන් ඉල්ලීම පිළිබඳ ව ශ්‍රී ලංකා නීතිඥ සංගමය විසින් විශේෂ ලිපියක් නිකුත් කර තිබෙනවා.

ඒ අදාළ සිදුවීම සම්බන්ධයෙන් ශ්‍රී ලංකා නීතිඥ සංගමයේ මතය දැනුම්දීමටයි.

එහි දැක්වෙන්නේ මෙවැන්නක්;

”කොළඹ අපරාධ කොට්ඨාසය විසින් කරන ලද වාචික ඉල්ලීමක් සම්බන්ධයෙන් වෘත්තීය උපදෙස් සඳහා ඉල්ලීම යි.

සාමාන්‍යයෙන් වෘත්තීය නීතිඥවරයෙකුට සිය රහස්‍ය සේවාදායක තොරතුරු අඩංගු මෙවලක් හෝ උපාංගයක් පොලිසියට භාරදීමට අයිතියක් නොමැත. ඊට බලකිරීමක් ද සිදු කළ නොහැකි ය.

මන්ද එය 1988 දරණ ශ්‍රේෂ්ඨාධිකරණ පනතේ (නීතිඥවරුන් සඳහා හැසිරීම සහ ආචාර විධි) රීතිවල 31 වන රීතිය උල්ලංඝනය කිරීමක් සිදු කරන බැවිනි.

මෙම කාරණය සම්බන්ධයෙන් ශ්‍රී ලංකා නීතිඥ සංගමය වන අප, වැඩබලන පොලිස්පතිවරයාට ලිපියක් යොමු කරන්නෙමු. ඒ සම්බන්ධයෙන් සිදුවන ඕනෑම සිදුවීමක් පිළිබඳව ශ්‍රී ලංකා නීතිඥ සංගමය (BASL) යාවත්කාලීන කිරීමට කටයුතු කරන බව ”ද සඳහන් වනවා.

හිටපු ජනාධිපති රනිල් වික්‍රමසිංහගේ මහජන සම්බන්ධතා පිළිබඳ අධ්‍යක්ෂ ජනරාල්වරයකුව සිටි තුසිත හල්ලොලුව ගමන්ගත් වාහනයට වෙඩි තැබීමේ සිද්ධිය සම්බන්ධයෙන් සිදු කෙරෙන විමර්ශන සඳහා ඔහුගේ නීතිඥයා වන දිනේෂ් දොඩම්ගොඩගේ ජංගම දූරකථනය භාරදෙන ලෙස කොළඹ අපරාධ කොට්ඨාසය විසින් දැනුම්දීමක් කරනු ලැබුවා.

ඊට ප්‍රතිචාර දක්වමිනුයි ශ්‍රී ලංකා නීතිඥ සංගමය අදාළ ලිපිය යොමු කර ඇත්තේ.

තුසිත හල්ලොලුව මෝටර් රථයකින් ගමන් කරමින් සිටියදී නාරහේන්පිට වටරවුම පාර ප්‍රදේශයේ දී පසුගිය දා (මැයි 17) රාත්‍රී යතුරුපැදියකින් පැමිණි නාඳුනන පුද්ගලයින් දෙදෙනෙකු විසින් ඔහුගේ වාහනයට වෙඩි තැබීමක් සිදු කරනු ලැබුවා.

එම අවස්ථාවේ දී මෝටර් රථය තුළ තුසිත හල්ලොලුවගේ නීතිඥවරයා වන නීතිඥ දිනේෂ් දොඩම්ගොඩ සිටි අතර ඔහු ද සුළු තුවාල ලබා රෝහල්ගත කෙරුණා.

තුසිත හල්ලොලුව ඉලක්ක කර ගනිමින් නාරහේන්පිට ප්‍රදේශයේ දී මෙම වෙඩි තැබීමේ සිද්ධිය සම්බන්ධයෙන් සිදු කරන විමර්ශන කොළඹ අපරාධ කොට්ඨාසය වෙත මේ වනවිට භාර දී ඇති අතර එහි ප්‍රතිඵලයක් ලෙසයි නීතිඥවරයාගේ දූරකථනය පොලිස් විමර්ශන සඳහා භාරදෙන ලෙසට ඉල්ලා ඇත්තේ.