කැනඩාවේ බ්‍රම්ප්ටන් ප්‍රාන්ත නගරාධිපති පැට්‍රික් බ්‍රවුන් මෙරට දෙමළ ජන සංහාරය පිළිබඳ ව සිදු කළ ප්‍රකාශය එම ප්‍රදේශයේ ඡන්ද අපේක්ෂාවෙන් සිදු කරන ලද්දක් බව විදේශ කටයුතු අමාත්‍ය විජිත හේරත් පවසනවා.
මාධ්‍යවේදියෙකු නැගූ ප්‍රශ්නයකට පිළිතුරු ලබාදෙමින් විදේශ කටයුතු අමාත්‍යවරයා පැවසුවේ, කැනඩාව තුළ පැන නැගි ඇති ජන සංහාර අර්බුදය වත්මන් රජය බලයට පත්වීමෙන් පසුව ඇති වූවක් නොව, එය 2021 වර්ෂයේ සිට ම වරින් වර ඇති වූවක් බවයි.
ශ්‍රී ලංකාව තුළ එල්ටීටීඊ යුද සමයේ දී මෙරට ත්‍රිවිධ හමුදාව ඇතුළු ආරක්ෂක අංශ විසින් රජය දැනුවත් ව දෙමළ ජන සංහාරයක් සිදු කිරීම ගැන කැනඩාවෙන් චෝදනා එල්ල වූ අතර 2021 දී බ්‍රම්ප්ටන් ප්‍රාන්තයේ දී ජන සංහාර ස්මාරකයක් ද ඉදිකිරීමට මුල්ගල් තැබුණා.
එම ස්මාරකය මැයි මස 10 වැනි දින (2025 වසරේ) විවෘත කෙරුණේ වත්මන් බ්‍රම්ප්ටන් නගරාධිපති පැට්‍රික් බ්‍රවුන්ගේ ප්‍රධානත්වයෙන්.
එහිදී නගරාධිපතිවරයා පැවසුවේ, කැනඩාවේ වෙසෙන කවර ශ්‍රී ලාංකිකයෙකු හෝ ශ්‍රී ලංකාව තුළ ජන සංහාරයක් සිදු වූ බවට පිළිනොගන්නේ ද, වහාම තම රටට පෙරලා යා යුතු බවත්, කිසිම දිනෙක කැනඩාවට එවැනි පුද්ගලයින් පිළිනොගන්නා බවයි.
පෙරේදා දිනයේ දී ශ්‍රී ලංකාවේ කැනේඩියානු මහකොමසාරිස්වරයා මුණගැසී විදේශ කටයුතු අමාත්‍ය විජිත හේරත් විසින් බ්‍රම්ප්ටන් හි ජන සංහාර ස්මාරකයක් ඉදිකිරීම ගැන මෙරට රජයේ දැඩි විරෝධතාවක් යළිත් මතු කළා.
