මාධ්‍යවේදී ප්‍රේමකීර්ති ද අල්විස් මහතාගේ මරණයට තමා සම්බන්ධ බවට ප්‍රේමකීර්ති ද අල්විස් මහතාගේ බිරිඳ ශ්‍රී ලංකා ගුවන්විදුලි සංස්ථාවේ දී සිදු කරන ලද අසත්‍ය ප්‍රකාශය හේතුවෙන් තම කීර්ති නාමයට විශාල හානියක් සිදු වී ඇති බැවින් එයට වන්දි ලෙස රුපියල් මිලියන 500ක වන්දියක් අය කරදෙන ලෙසට ගුවන් විදුලි සංස්ථාවේ හිටපු සභාපතිවරයෙකු මෙන් ම හිටපු පාර්ලිමේන්තු මන්ත්‍රීවරයකු වන හඩ්සන් සමරසිංහ මහතා කොළඹ දිසා විනිසුරු සඳුන් විතාන මහතා හමුවේ නඩුවක් ගොනු කරමින් ඉල්ලා සිටිනවා.
අද (18) දින ජනාධිපති නීතිඥ කුවේරා ද සොයිසා මහතාගේ මෙහෙයවීම යටතේ හඩ්සන් සමරසිංහ මහතා අද දින අධිකරණය හමුවේ පැමිණිල්ලේ සාක්ෂි ලබාදෙමින් මෙම ඉල්ලීම සිදු කළා.
ඒ අනුව තමන් විසින් අධිකරණය හමුවේ පැමිණිල්ලේ සාක්ෂි ලෙස ඉදිරිපත් කර ඇති ලේඛන හා සාක්ෂිකාරය විසින් ප්‍රකාශ කරන ලද එම අසත්‍ය ප්‍රකාශය මාධ්‍ය මගින් පළ කළ පුවත්පත් ද පැමිණිල්ලේ සාක්ෂි ලෙස ලකුණු කර ඇති බැවින් ඒවා අධ්‍යයනය කර තමන් ඉල්ලා සිටින සහන ලබාදෙන ලෙසට හඩ්සන් සමරසිංහ මහතා අධිකරණයෙන් ඉල්ලා සිටියා.
පැමිණිල්ලේ සාක්ෂි අවසන් වීමෙන් අනතුරුව විත්තිය වෙනුවෙන් හරස් ප්‍රශ්න ඇසීම සඳහා එම නඩුව ලබන ජූනි මස 25 වන දින නැවත කැඳවීමට විනිසුරුවරයා එහිදී නියම කළා.
නීතිඥ නිශාන් බාලසූරිය හා නීතිඥ සුමේධ මහවත්තආරච්චි සමග ජනාධිපති නීතිඥ කුවේර ද සොයිසා මහතා අධිකරණය හමුවේ පෙනී සිටියා.
