සමාජය තුළ මේ වනවිට පොදු නීතියට යටත් නොවූ කුඩා කුඩා ආණ්ඩු ගොඩනඟාගෙන ඇති බව ජනාධිපති අනුර කුමාර දිසානායක පවනවා.
ආර්ථික බලය, ව්‍යාපාරික බලය, නීති විරෝධී අවි බලය වැනි විවිධ බලයන් හරහා මෙම කුඩා ආණ්ඩු පිහිටුවා ඇති බවයි ජනාධිපතිවරයා සඳහන් කළා.
ශ්‍රී ලංකා අමරපුර මහානිකායේ උත්තරීතර මහානායක පදවියට පත් අතිපූජ්‍ය කරගොඩ උයන්ගොඩ මෛත්‍රීමූර්ති මහ නාහිමියන්ට ශ්‍රී සන්නස් පත්‍රය පිළිගැන්වීම උත්සවයට එක්වෙමින් ජනාධිපතිවරයා මෙම අදහස් පළ කර සිටියා.
එහිදී වැඩිදුරටත් අදහස් දක්වමින් ජනාධිපතිවරයා පැවසුවේ මෙලෙස පිහිටුවාගෙන ඇති කුඩා ආණ්ඩුවලට මෙරට පුරවැසියන්ගේ අත්‍යවශ්‍ය බොහෝ දෑ පැහැරගැනීමට හැකි වී ඇති බවයි.
ඒ, අනුව යහපත් සමාජයක් නිර්මාණය කිරීම වෙනුවෙන් රාජ්‍ය නීතියේ ආධිපත්‍යයට යටත්වන රාජ්‍යක් බවට පරිවර්තන කළ යුතු බවයි ජනාධිපති අනුර කුමාර මෙහිදී සඳහන් කළේ.
එමෙන්ම නීතිය සහ සාමය ස්ථාපිත කිරීමේ ප්‍රධාන ආයතනයේ පුද්ගලයා නීතියෙන් කට්ටි පනිමින් සිටිනවා නම්; නීතියට යටත් සමාජයක් කරා පොදු පුරවැසියාට ආරාධනා කිරීමට ගැටළුවක් බවතින බවයි ජනාධිපතිවරයා පැවසුවේ.
ශ්‍රී ලංකා අමරපුර මහානිකායේ උත්තරීතර මහානායක පදවියට පත් අතිපූජ්‍ය කරගොඩ උයන්ගොඩ මෛත්‍රීමූර්ති මහ නාහිමියන්ට ශ්‍රී සන්නස් පත්‍රය පිළිගැන්වීම ජනාධිපති අනුර කුමාර දිසානායක අතින් අද (10) සිදු කෙරුණා.
ඒ, කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලා පරිශ්‍රයේදී සංවිධානය කර තිබූ උත්සවයකදීයි.
