ශ්වසන අපහසුතා උත්සන්න වීම හේතුවෙන් මේ වනවිට (24) රෝමයේ ජෙමෙලි රෝහලේ ප්‍රතිකාර ලබන ෆ්‍රැන්සිස් පාප් වහන්සේ රෝහල්ගත ව ප්‍රතිකාර ලබන 10 වැනි දිනය ද සාර්ථක ව අවසන් කෙරුණු බව වතිකානුව නිවේදනය කර තිබෙනවා.
vaticannews පුවත් සේවය විසින් මෙම කරුණ වාර්තා කර ඇති බවයි දක්නට ලැබෙන්නේ.
මුහුණුපොත හරහා ෆ්‍රැන්සිස් පාප් වහන්සේ ස්වර්ගස්ථ වී ඇති බවට වන ව්‍යාජ පුවත් සංසරණය වීමෙන් පසුව වතිකානුවෙන් මෙම පුවත යාවත්කාලීන වී තිබීමත් විශේෂත්වයක්.
නියුමෝනියා රෝගී තත්ත්වය උග්‍ර වීම හේතුවෙන් 88 හැවිරිදි වියෙහි පසුවන ෆ්‍රැන්සිස් පාප් වහන්සේ පසුගිය සතියේ යළි රෝහල්ගත කෙරුණා.
එමෙන්ම උන්වහන්සේ ඊයේ රාත්‍රියේ දී පෙරට වඩා සුවයෙන් නිදාගත් බවයි ශුද්ධාසනයේ මාධ්‍ය කාර්‍යාලය නිවේදනය කර ඇත්තේ.
22 වැනි දින සිට මේ දක්වා පාප් වහන්සේට යළිත් කිසිදු ශ්වසන අපහසුතාවක් ඇති වී නොමැති වුව ද උන්වහන්සේගේ තත්ත්වය තවමත් පවතින්නේ බරපතළ මට්ටමේ බවට ද වතිකානුවේ ශුද්ධාසනයේ මාධ්‍ය කාර්‍යාලය නිවේදනයේ වැඩිදුරටත් සඳහන් කරනවා.
එමෙන්ම පාප් වහන්සේගේ ශරීරයේ හිමොග්ලොබින් මට්ටම ඉහළ නැංවීම සඳහා රෝහල මගින් රුධිර පාරවිලයනය ද ලබා දුන්නා.
නමුත් උන්වහන්සේගේ රුධිර පරීක්ෂණවලින් අනාවරණය වී ඇත්තේ වකුගඩු තවමත් යම්කිසි අයුරකින් අකර්මණ්‍ය වි ඇති බවත් එය පාලන මට්ටමකට ගැනීමට වෛද්‍යවරු සමත් වී ඇති බවයි.
නාස් මාර්ගයට අධි ප්‍රවාහ ඔක්සිජන් ලබා දී ඇති බව ද වතිකානු නිවේදනයේ සඳහන්.
