කුෂ් මත්ද්‍රව්‍ය තොගයක් නීතිවිරෝධී ලෙස මෙරටට රැගෙන ආ පුද්ගලයෙක් කටුනායක ගුවන් තොටුපොළේ දී ඊයේ (31) පස්වරුවේ අත්අඩංගුවට ගෙන තිබෙනවා.
පොලිස් මත්ද්‍රව්‍ය කාර්යාංශයේ නිලධාරීන් පිරිසක් විසින් සැකකරු අත්අඩංගුවට ගෙන ඇති අතර, එහිදී ඔහු විසින් රැගෙන ආ කුෂ් මත්ද්‍රව්‍ය කිලෝ ග්‍රෑම් 02ක් සොයා ගැනීමට හැකිව ඇති බවයි වාර්තා වුණේ.
මෙම සැකකරු ඊයේ (31) තායිලන්තයේ බැංකොක් නුවර සිට ශ්‍රී ලන්කන් ගුවන් සේවයේ යූ.එල්.- 403 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.
අනතුරුව ඔහු ගුවන් තොටුපොළ තීරු බදු රහිත සාප්පු සංකීර්ණය වෙත ගොස් තවත් භාණ්ඩ තොගයක් ද මිළට ගෙන ඇති බවයි අනාවරණය වී ඇත්තේ.
මෙම පුද්ගලයා සම්බන්ධයෙන් සැක සිතූ ගුවන් තොටුපොළ පොලිස් මත්ද්‍රව්‍ය කාර්යාංශයේ නිලධාරීන් විසින් ඔහුව පරීක්ෂා කිරීමේ දී ඔහු විසින් රැගෙන ආ ගමන් මළු තුළ සඟවා තිබිය දී මෙම මත්ද්‍රව්‍ය සොයා ගැනීමට හැකිව තිබෙනවා.
මොහු සන්තකයේ තිබී අත්අඩංගුවට ගැනුණු කුෂ් මත්ද්‍රව්‍ය තොගයේ වටිනාකම රුපියල් කෝටි 02ක් පමණවන බවයි වාර්තා වුණේ.
අත්අඩංගුවට ගැනුණු සැකකරු හංවැල්ල ප්‍රදේශයේ පදිංචිකරුවෙක්වන අතර, 36 හැවිරිදි මොහු නිරන්තරයෙන් ගුවන් ගමන්වල නිරතවන අයෙක් බවයි වාර්තා වන්නේ.
මොහුව ගුවන් තොටුපොළේ සිට රැගෙන යාම සදහා පැමිණ සිටි උඩුගම්පොළ ප්‍රදේශයේ පදිංචි 31 හැවිරිදි පුද්ගලයෙකු ද පොලිස් මත්ද්‍රව්‍ය කාර්යාංශයේ නිලධාරීන් විසින් අත්අඩංගුවට ගෙන තිබෙනවා.
