2008 වසරේ කොළඹ හා තදාසන්න ප්‍රදේශවල තරුණයින් 11 දෙනෙකු පැහැරගෙන ගොස් අතුරුදන් කිරීමේ සිද්ධියට අදාළව කොළඹ ත්‍රිපුද්ගල මහාධිකරණ විනිසුරු මඩුල්ල ඉදිරියේ ගොනු කර තිබෙන නඩුවේ විත්තිකරුවකු වශයෙන් තමන්ව නම් කිරීමට නීතිපතිවරයා ගෙන තිබෙන තීරණය බල රහිත කිරීමේ නියෝගයක් ලබාදෙන ලෙස ඉල්ලා හිටපු නාවික හමුදාපති වසන්ත කරන්නාගොඩ ඉදිරිපත් කළ පෙත්සමේ විභාග කටයුතුවලින් පංච පුද්ගල විනිසුරු මඩුල්ලේ සාමාජික විනිසුරු අමල් රණරාජා මහතා අද (28) ඉවත්වුණා.
පෙත්සම අද මායාදුන්නේ කොරයා, පී කුමාරන් රත්නම්, ශෂී මහේන්ද්‍රන්, දමිත් තොටවත්ත සහ අමල් රණරාජා යන අභියාචනාධිකරණ විනිසුරු මඩුල්ල ඉදිරියේ කැඳවූවා.
පෙත්සම කැඳවූ අවස්ථාවේ විනිසුරු මඩුල්ලේ සාමාජික විනිසුරු අමල් රණරාජා මහතා පවසා සිටියේ, තමන් පෙත්සමේ විභාග කටයුතුවලින් ඉවත්වන බවයි.
ඒ අවස්ථාවේදී මෙම නඩුවට අදාළව විනිසුරු අමල් රණරාජා මහතා මීට පෙර නියෝග කිහිපයක් නිකුත් කර තිබෙන බැවින් පෙත්සම් විභාගයෙන් විනිසුරු අමල් රණරාජා මහතා ඉවත්වන බව විනිසුරු මඩුල්ලේ සභාපති විනිසුරු මායාදුන්නේ කොරයා මහතා ප්‍රකාශ කළා.
එබැවින් පෙත්සම නව පංච පුද්ගල විනිසුරු මඩුල්ලක් ඉදිරියේ ජනවාරි මස 31 වැනිදා කැඳවන බව විනිසුරු මඬුල්ල නිවේදනය කර සිටියා.
තරුණයින් 11 දෙනෙකු පැහැරගෙන ගොස් අතුරුදන් කිරීම සම්බන්ධයෙන් ගොනුකර ඇති නඩුවේ විත්තිකරුවකු වශයෙන් තමන්ව නම් කිරීමට නීතිපතිවරයා ගෙන තිබෙන තීරණය නීතියට පටහැනි බව සඳහන් කරමින් හිටපු නාවික හමුදාපතිවරයා අභියාචනාධිකරණයට හමුවේ මෙම පෙත්සම ඉදිරිපත් කර තිබෙනවා.
එබැවින් නීතිපතිවරයාගේ එම තීරණය බල රහිත කිරීමේ රිට් ආඥාවක් නිකුත් කරන ලෙස ඔහු පෙත්සම මඟින් ඉල්ලා සිටිනවා.
