කළුතර හා අවට ප්‍රදේශ රැසකට ම විදෙස්ගත මත්ද්‍රව්‍ය ජාවාරම්කරුවකුගේ අයිස් මත්ද්‍රව්‍ය යතුරුපැදි යොදාගනිමින් බෙදා හැරි බවට චෝදනා ලැබ සිටින ‘Sf කපුවා’ යන අන්වර්ථ නාමයෙන් හඳුන්වනු ලබන ප්‍රධාන පෙළේ අයිස් මත්ද්‍රව්‍ය ජාවාරම්කරුවකු සහ තවත් අයෙකු යතුරුපැදි 5ක් සමග කළුතර කොට්ඨාස අපරාධ විමර්ශන අංශය මගින් ඊයේ (23) සවස අත්අඩංගුවට ගැනුණා.
කළුතර කොට්ඨාස විෂ මත්ද්‍රව්‍ය වැටලීම් ඒකකයට ලද තොරතුරක් මත කළුතර නගරය, පානදුර ,හොරණ සහ බේරුවල ප්‍රදේශවල යතුරුපැදි යොදාගෙන අයිස් මත්ද්‍රව්‍ය ජාවාරමේ නිරත වන පුද්ගලයෙකු කළුතර ප්‍රධාන පෙළේ පාසලක් ආසන්නයේ පිහිටි නිවසක රැඳී සිටිමින් ජාවාරමේ නිරත වන බවටයි තොරතුරු ලැබී ඇත්තේ.
ඒ අනුව ක්‍රියාත්මක වූ පොලිසිය අදාළ වැටලීම සිදු කර සැකකරු අත් අඩංගුවට ගැනුණු අතර සිදු කළ මූලික විමර්ශනවල දී හෙළි ව ඇත්තේ ඔහු හිටපු යුද හමුදා විශේෂ බලකායේ සෙබළෙකු වන බවයි.
සැකකරු සන්තකයේ තිබී අයිස් ග්‍රෑම් 10කට අධික ප්‍රමාණයක් සහ යතුරුපැදි 05ක් සොයා ගැනුණා.
ඔහුගෙන් කළ ප්‍රශ්න කිරීම්වල දී මත්ද්‍රව්‍ය බෙදාහැරීමට සම්බන්ධ තවත් අයෙකු අත් අඩංගුවට ගැනුණු අතර සැකකරුවන් වයස අවුරුදු 38-39 වියෙහි පසුවන්නන්.
මොවුන් දෙදෙනා ම කළුතර බන්ධනාගාරයේ දී මීට පෙර මත්ද්‍රව්‍ය චෝදනාවලට සිරගත ව සිටි අය බවත්, සිර මැදිරියේ දී හඳුනාගත්තවුන් බවත් හෙළි ව තිබෙනවා.
අත්අඩංගුවට පත් සැකකරුවන් අද (24) දින කළුතර මහේස්ත්‍රාත් අධිකරණයට ඉදිරිපත් කිරීමට නියමිතයි.
