ජාත්යන්තරය හමුවේ ශ්රී ලංකාවේ ප්රතිරූපය ඔසවා තැබීම තානාපතිවරයා සතු වගකීමක් බව ජනාධිපති අනුර කුමාර දිසානායක අවධාරණය කරනවා.
පසුගිය කාලයේ රාජතාන්ත්රික සේවාවන්හි නිරත නිලධාරීන් ශ්රී ලංකාවේ නාමය අපකීර්තියට පත් කළ අවස්ථා තිබූ බවත් නව පත්වීම් ලබාගන්නා රාජ්ය තාන්ත්රිකයන්ගෙන් එවැන්නක් බලාපොරොත්තු නොවන බවත් ජනාධිපතිවරයා පෙන්වා දෙන්නේ.
විදෙස් තානාපති සේවය සඳහා නව රාජ්ය තාන්ත්රිකයින් පත් කිරීම වෙනුවෙන් ජනාධිපති කාර්යාලයේ අද (07) පැවති සාකච්ඡාවේදී ජනාධිපති අනුර කුමාර දිසානායක මෙම අදහස් පළ කළා.
විදේශගත ශ්රී ලාංකිකයින්ට සපයනු ලබන සේවාව පිළිබඳ විශේෂ අවධානයක් යොමු කර කටයුතු කරන ලෙසත් එම රටවල සිටින සියළු ශ්රී ලාංකිකයන්ට සේවා සැපයීමේදී ඒ සඳහා මූලිකත්වය දෙමින් කිසිදු භේදයකින් තොරව සාධාරණව කටයුතු කරන ලෙසත් ජනාධිපතිවරයා නව රාජ්ය තාන්ත්රිකයන්ට උපදෙස් ලබා දුන්නා.
ශ්රී ලාංකික ශ්රමිකයින් සිටින මැද පෙරදිග, දකුණු කොරියාව සහ ජපානය වැනි රටවල රාජ්යතාන්ත්රික සේවා සැපයීමේදී වැඩි අවධානයක් යොමු කළ යුතු බව ද මෙහිදී සාකච්ඡා කෙරුණා.
ඍජු විදේශ ආයෝජන ආකර්ෂණය කර ගැනීම සඳහා තිබෙන අවස්ථා ප්රමාණය වැඩි කර ගැනීම මෙන්ම ශ්රී ලංකාවේ සිටින ආයෝජකයන්ට නව වෙළඳපොළ අවස්ථා සොයා ගැනීම රාජතාන්ත්රික සේවාව හරහා සිදු කළ හැකි බව ජනාධිපතිවරයා සඳහන් කර සිටියා.
ශ්රී ලංකාවේ ආර්ථිකය නගා සිටුවීම සඳහා සෘජු විදේශ ආයෝජන කැඳවා ගෙන ඒම තානාපතිවරයාට පැවරෙන ප්රධාන වගකීමක් බවත්, ඒ සඳහා අවශ්ය සහයෝගය ලබාදීමට රජය සූදානම් බවත්, ජනාධිපති අනුර කුමාර දිසානායක සඳහන් කළා.
මේ අතර ජනාධිපති අනුර කුමාර දිසානායක, විදේශ තානාපති සේවය සඳහා තානාපතිවරු සිව්දෙනෙකු සහ මහ කොමසාරිස්වරයකු පත් කර තිබෙනවා.
රාජ්ය තාන්ත්රික සේවයේ වසර විස්සකට වඩා පළපුරුද්ද හා අත්දැකීම් සහිත නිලධාරීන් පිරිසක් මෙලෙස නව රාජ්ය තාන්ත්රිකයින් ලෙස පත් කර ඇති බවයි වාර්තා වන්නේ.
ඒ අනුව,
කටාර් රාජ්යයේ තානාපති – ආර්.එස්.ඛාන් අසාඩ්
රුසියානු තානාපති – එස්.කේ. ගුණසේකර
කුවේට් තානාපති – එල්.පී. රත්නායක
ඊජිප්තු තානාපති – ඒ.එස්.කේ. සෙනෙවිරත්න
නවසීලන්ත මහ කොමසාරිස් – ඩබ්ලිව් .ජී.එස්. ප්රසන්න පත්කර තිබෙනවා.
